വാഷിംഗ്ടൺ: (KVARTHA) അമേരിക്കൻ പ്രസിഡന്റ് തിരഞ്ഞെടുപ്പുകളിൽ, ഓരോ സംസ്ഥാനത്തും ലഭിക്കുന്ന ഇലക്ടറൽ വോട്ടുകളുടെ എണ്ണം വ്യത്യസ്തമാണ്. ജനസംഖ്യയെ അടിസ്ഥാനമാക്കിയാണ് ഈ എണ്ണം നിശ്ചയിക്കുന്നത്. ഉദാഹരണത്തിന്, ജനസംഖ്യാപരമായി വലിയ സംസ്ഥാനമായ കാലിഫോർണിയക്ക് 54 ഇലക്ടറൽ വോട്ടുകൾ ഉണ്ടെങ്കിൽ, ചെറിയ സംസ്ഥാനമായ അലാസ്കക്ക് മൂന്ന് വോട്ടുകൾ മാത്രമേ ഉള്ളൂ. 

ഇതിനർത്ഥം, കാലിഫോർണിയയിലെ വോട്ടർമാർക്ക് അലാസ്കയിലെ വോട്ടർമാരെക്കാൾ തിരഞ്ഞെടുപ്പ് ഫലത്തെ സ്വാധീനിക്കാൻ കൂടുതൽ സാധ്യതയുണ്ട് എന്നാണ്. എന്നാൽ, ഓരോ സംസ്ഥാനത്തെയും വോട്ടർമാരുടെ രാഷ്ട്രീയ പ്രവണതകൾ വ്യത്യസ്തമാണ്. ചില സംസ്ഥാനങ്ങൾ ഒരു പ്രത്യേക പാർട്ടിയെ തുടർച്ചയായി പിന്തുണയ്ക്കുന്നവയാണ്. 

ആകെ 538 ഇലക്‌ട്രൽ കോളജ് വോട്ടുകളാണുള്ളത്, അതിൽ ഏതൊരു സ്ഥാനാർത്ഥിക്കും വിജയിക്കാൻ 270 വോട്ടുകൾ വേണം. അമേരിക്കയിൽ 50 സംസ്ഥാനങ്ങളുണ്ട്, എന്നാൽ അവയിൽ മിക്കതും ഒരേ പാർട്ടിക്ക് അനുകൂലമായി വോട്ടുചെയ്യുന്നു. ഉദാഹരണത്തിന്, കാലിഫോർണിയ പൊതുവെ ഡെമോക്രാറ്റിക് പാർട്ടിയെ പിന്തുണയ്ക്കുന്നു, ടെക്സസ് റിപ്പബ്ലിക്കൻ പാർട്ടിയെ പിന്തുണയ്ക്കുന്നു. 

എന്നാൽ, ചില സംസ്ഥാനങ്ങളിൽ വോട്ടർമാരുടെ മുൻഗണനകൾ വ്യക്തമല്ലാത്തതിനാൽ ഏത് പാർട്ടിയെ പിന്തുണയ്ക്കുമെന്ന് പ്രവചിക്കാൻ കഴിയാത്ത അവസ്ഥയാണ്. ഇത്തരം സംസ്ഥാനങ്ങളെയാണ് 'സ്വിംഗ് സ്റ്റേറ്റുകൾ' അഥവാ ചാഞ്ചാടുന്ന സംസ്ഥാനങ്ങൾ എന്ന് പറയുന്നത്. തിരഞ്ഞെടുപ്പ് ഫലത്തെ നിർണയിക്കുന്നതിൽ ഈ സ്വിംഗ് സ്റ്റേറ്റുകൾക്ക് വളരെ പ്രാധാന്യമുണ്ട്. ഇവയിൽ നിന്നാണ് സ്ഥാനാർത്ഥികളുടെ ജയപരാജയങ്ങൾ തീരുമാനിക്കുന്നത്, ഇവയെ യുദ്ധഭൂമികൾ എന്നും വിളിക്കുന്നു.

അതിനാൽ, ഓരോ തിരഞ്ഞെടുപ്പ് സമയത്തും സ്ഥാനാർത്ഥികളും പാർട്ടികളും ഈ സ്വിംഗ് സ്റ്റേറ്റുകളിൽ കൂടുതൽ ശ്രദ്ധ കേന്ദ്രീകരിക്കാറുണ്ട്. 2024 ലെ തിരഞ്ഞെടുപ്പിൽ വിസ്കോൺസിൻ, നെവാഡ, മിഷിഗൺ, നോർത്ത് കരോലിന, അരിസോണ, ജോർജിയ, പെൻസിൽവാനിയ എന്നീ സംസ്ഥാനങ്ങളാണ് പ്രധാന സ്വിംഗ് സ്റ്റേറ്റുകളായി കണക്കാക്കപ്പെടുന്നത്. ഈ സംസ്ഥാനങ്ങളിലെ വോട്ടർമാരുടെ തീരുമാനമാണ് അടുത്ത പ്രസിഡന്റിനെ നിർണയിക്കുക.

വിവിധ മാധ്യമങ്ങളുടെ സർവേ കണക്കുകൾ പ്രകാരം പെൻസിൽവാനിയ, നെവാഡ, നോർത്ത് കരോലിന, അരിസോണ എന്നിവിടങ്ങളിലാണ് ട്രംപ് മുന്നിട്ട് നിൽക്കുന്നത്. വിസ്കോൺസിൻ, മിഷിഗൺ എന്നിവിടങ്ങളിലാണ് കമല ഹാരിസ് മുന്നിൽ. അന്തിമ ഫലത്തിലൂടെ മാത്രമേ ചിത്രം തെളിയൂ.

#USElection #SwingStates #2024Election #PoliticalNews #USPolitics #Polls