തിരുവനന്തപുരം: (KVARTHA) ശബരിമലയിൽ എത്തുന്ന എല്ലാ തീർഥാടകർക്കും ഇനി ഇൻഷുറൻസ് പരിരക്ഷ ഉറപ്പാക്കും. ഇതുവരെ നാല് ജില്ലകളിൽ മാത്രം ലഭ്യമായിരുന്ന അപകട ഇൻഷുറൻസ് പദ്ധതി തിരുവിതാംകൂർ ദേവസ്വം ബോർഡ് സംസ്ഥാന വ്യാപകമായി വ്യാപിപ്പിക്കാൻ തീരുമാനിച്ചു. 

ഇതിലൂടെ കേരളത്തിൽ എവിടെ വെച്ചുണ്ടാകുന്ന അപകടത്തിൽ തീർഥാടകർ മരിച്ചാലും അവരുടെ ആശ്രിതർക്ക് അഞ്ച് ലക്ഷം രൂപ ധനസഹായം ലഭിക്കും. നേരത്തെ പത്തനംതിട്ട, ആലപ്പുഴ, ഇടുക്കി, കോട്ടയം ജില്ലകളിൽ സംഭവിക്കുന്ന അപകടങ്ങൾക്ക് മാത്രമായിരുന്നു തിരുവിതാംകൂർ ദേവസ്വം ബോർഡിൻ്റെ ഇൻഷുറൻസ് ആനുകൂല്യം ലഭിച്ചിരുന്നത്. ഈ ഇൻഷുറൻസിൻ്റെ പ്രീമിയം തുക പൂർണ്ണമായും ദേവസ്വം ബോർഡ് തന്നെ വഹിക്കും.

ദേവസ്വം ബോർഡിലെ എല്ലാ ജീവനക്കാരും ഈ ഇൻഷുറൻസ് പരിരക്ഷയുടെ പരിധിയിൽ വരുന്നതാണ്. മണ്ഡല-മകരവിളക്ക് തീർഥാടന കാലത്തും, മാസപൂജകൾക്കും, ഉത്സവം ഉൾപ്പെടെയുള്ള മറ്റ് ചടങ്ങുകൾക്കും പങ്കെടുക്കാൻ എത്തുന്നതിനിടെ ഉണ്ടാകുന്ന അപകടങ്ങൾക്കാണ് ഈ ഇൻഷുറൻസ് ആനുകൂല്യം ലഭിക്കുക എന്ന് ദേവസ്വം ബോർഡ് പ്രസിഡൻ്റ് പി.എസ്. പ്രശാന്തും അംഗം എ. അജികുമാറും സംയുക്തമായി അറിയിച്ചു.

ഹൃദയാഘാതം ഉൾപ്പെടെയുള്ള രോഗങ്ങൾ മൂലം ശബരിമലയിൽ വെച്ച് മരിക്കുന്ന തീർഥാടകരുടെ കുടുംബങ്ങൾക്കും ഇനി സാമ്പത്തിക സഹായം ലഭിക്കും. നിലവിൽ ഇങ്ങനെയുള്ള മരണങ്ങൾക്ക് ആനുകൂല്യങ്ങൾ ഒന്നും ലഭിച്ചിരുന്നില്ല. എന്നാൽ ഇനിമുതൽ അത്തരം സാഹചര്യങ്ങളിൽ മരിക്കുന്ന തീർഥാടകരുടെ ആശ്രിതർക്ക് മൂന്ന് ലക്ഷം രൂപ ധനസഹായം നൽകാൻ ദേവസ്വം ബോർഡ് തീരുമാനിച്ചിട്ടുണ്ട്. 

ഇതിനായി ഒരു പ്രത്യേക നിധി രൂപീകരിക്കും. ഈ നിധിയിലേക്ക് പണം കണ്ടെത്താനായി അയ്യപ്പ ദർശനത്തിന് വെർച്വൽ ക്യൂ വഴിയും സ്പോട്ട് ബുക്കിംഗ് വഴിയും രജിസ്റ്റർ ചെയ്യുന്നവരിൽ നിന്ന് താൽപ്പര്യമുള്ളവരിൽ നിന്നും അഞ്ച്  രൂപ വീതം ഈടാക്കും. ഇതിനു പുറമെ സന്നദ്ധരായ മറ്റ് അയ്യപ്പ ഭക്തരിൽ നിന്നും സംഭാവനകൾ സ്വീകരിച്ചും ഈ പ്രത്യേക നിധിയിലേക്ക് പണം സമാഹരിക്കും. ഈ നിധിയിൽ കൂടുതൽ തുക എത്തുകയാണെങ്കിൽ, അപകടത്തിൽ മരിക്കുന്നവർക്കുള്ള സഹായധനം അഞ്ച് ലക്ഷം രൂപ വരെയായി ഉയർത്തുന്നതും ബോർഡിൻ്റെ പരിഗണനയിലാണ്.

കഴിഞ്ഞ തീർഥാടന കാലത്ത് മാത്രം 48 തീർഥാടകരാണ് ശബരിമലയിൽ ഹൃദയാഘാതം മൂലമോ ശ്വാസതടസ്സം മൂലമോ മരണപ്പെട്ടത്. ഈ സാഹചര്യത്തിലാണ് ദേവസ്വം ബോർഡിൻ്റെ ഈ പുതിയ തീരുമാനം ഏറെ പ്രശംസനീയമാകുന്നത്. എല്ലാ തീർഥാടകർക്കും സുരക്ഷയും സാമ്പത്തികപരമായ താങ്ങും നൽകുന്ന ഈ പദ്ധതി ഒരു പുതിയ കാൽവെപ്പായി വിലയിരുത്തപ്പെടുന്നു.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.  

The Travancore Devaswom Board has extended its accident insurance coverage statewide for all Sabarimala pilgrims, providing ₹5 lakhs for accidental deaths anywhere in Kerala. Additionally, a financial assistance of ₹3 lakhs will be given to the families of pilgrims who die due to illness at Sabarimala. A special fund will be created through voluntary contributions from pilgrims registering online and spot booking, as well as donations from devotees.

#SabarimalaPilgrimage #InsuranceCoverage #KeralaNews #DevaswomBoard #PilgrimSafety #FinancialAssistance