തിരുവനന്തപുരം: (KVARTHA) വിതുര-പൊന്മുടി സംസ്ഥാന ഹൈവേയിലെ സ്വരാജ് ഗേറ്റ് പരിസരത്തായി യക്ഷിയെ കണ്ടെന്ന് സാമൂഹ്യ മാധ്യമങ്ങളിൽ വ്യാപകമായി പ്രചാരണം. ഈ സംഭവത്തിൽ വിതുര പൊലീസ് അന്വേഷണം ആരംഭിച്ചിട്ടുണ്ട്. ഭീതി പരത്തുന്ന തരത്തിലുള്ള ഒരു സ്ത്രീയുടെ ചിത്രവും ശബ്ദരേഖയുമാണ് യക്ഷിയെന്ന പേരിൽ പ്രചരിക്കുന്നത്. 

സ്വരാജ് ഗേറ്റിൽ നിന്ന് ചായത്തേക്ക് പോകുന്ന വഴി യക്ഷിയെ കണ്ടെന്നും ഭാഗ്യവശാൽ രക്ഷപ്പെട്ടതെന്നും അതിനാല്‍ അതുവഴി പോകുന്നവർ ശ്രദ്ധിക്കണമെന്നുമാണ് ശബ്ദരേഖയില്‍ പറയുന്നത്. എന്നാൽ പൊലീസ് നടത്തിയ അന്വേഷണത്തിൽ ഈ ചിത്രം ബീഹാറിലെ ഒരു ഗ്രാമത്തെക്കുറിച്ചുള്ളതാണെന്ന് കണ്ടെത്തി. ശബ്ദരേഖയുടെ ഉറവിടം ഇതുവരെ കണ്ടെത്താനായിട്ടില്ലെങ്കിലും, പ്രദേശവാസിയുടെതാണെന്ന് പൊലീസ് സംശയിക്കുന്നു.

ലഹരി വ്യാപനവുമായി ബന്ധമുണ്ടോ?

യക്ഷിക്കഥയുടെ മറവില്‍ നിരോധിത ലഹരി വസ്‌തുക്കളുടെ വില്‍പ്പന നടത്തുന്നതിനായാണ് പ്രചാരണം നടത്തുന്നതെന്ന് പൊലീസ് പറയുന്നു. ഈ വ്യാജപ്രചാരണത്തിന് പിന്നിൽ അനധികൃത ലഹരി വ്യാപന സംഘമാണോയെന്ന സംശയം പൊലീസിനുണ്ട്. രാത്രി സമയത്ത് ചിലർ സ്വരാജ് ഗേറ്റിന് സമീപം ബൈക്കില്‍ വന്നതിനുശേഷം മടങ്ങുന്നതായി നാട്ടുകാർ പറയുന്നത് പൊലീസ് അന്വേഷിക്കുന്നുണ്ട്.

ഈ വ്യാജപ്രചാരണം മൂലം സ്വരാജ് ഗേറ്റ് പരിസരത്തെ ജനങ്ങൾ ഭീതിയിലാണ്. നിലവിൽ സ്വരാജ് ഗേറ്റും ഇതിനോട് ചേർന്നുള്ള കഫറ്റീരിയയും ശുചിമുറിയും വിശ്രമകേന്ദ്രവുമെല്ലാം അടഞ്ഞ് കിടക്കുകയാണ്.
പൊലീസ് ജനങ്ങളോട് അത്തരം വ്യാജപ്രചാരണങ്ങൾ വിശ്വസിക്കാതിരിക്കാനും, സംശയം തോന്നിയാൽ ഉടൻ പൊലീസിൽ വിവരം നൽകാനും നിർദ്ദേശിച്ചു.

#YakshiRumor, #SwarajGate, #Thiruvananthapuram, #FalseRumors, #PoliceInvestigation, #KeralaNews