പഴയ വിജയനിൽ നിന്ന് പുതിയ വിജയനാകുമോ? പിണറായി പ്രതിപക്ഷ നേതാവാകുമ്പോൾ രാഷ്ട്രീയ കേരളം ഉറ്റുനോക്കുന്നു

ഭാമനാവത്ത് 

കണ്ണൂർ: (KVARTHA) നിയമസഭാ തിരഞ്ഞെടുപ്പിലെ സമാനതകളില്ലാത്ത തോൽവിക്ക് പിന്നാലെ മുൻ മുഖ്യമന്ത്രിയും പിബി അംഗവുമായ പിണറായി വിജയനെ പ്രതിപക്ഷ നേതാവാക്കാനുള്ള സിപിഎം തീരുമാനം എൽഡിഎഫിൻ്റെ തിരിച്ചുവരവിനുള്ള സാധ്യതകളെ പ്രതിസന്ധിയിലാക്കുമെന്ന് രാഷ്ട്രീയ നിരീക്ഷകർ വിലയിരുത്തുന്നു. 81 വയസ്സ് പിന്നിട്ട പിണറായിയുടെ ആരോഗ്യനില പ്രതിപക്ഷ നേതാവിൻ്റെ കഠിനമായ ചുമതലകൾക്ക് അനുയോജ്യമാണോ എന്ന ചോദ്യം പാർട്ടിക്കുള്ളിൽ നിന്നുതന്നെ ഉയരുന്നുണ്ട്.

തിരുത്തൽ പ്രക്രിയ അട്ടിമറിച്ചെന്ന് ആക്ഷേപം

ജനങ്ങൾ പൂർണ്ണമായും തിരസ്കരിച്ച ഒരാളെത്തന്നെ വീണ്ടും പ്രതിപക്ഷ നേതാവാക്കുന്നത് വഴി പാർട്ടിക്കുള്ളിൽ നടക്കേണ്ട തിരുത്തൽ പ്രക്രിയയെ നേതൃത്വം അട്ടിമറിച്ചെന്ന വികാരം അണികൾക്കിടയിലുണ്ട്. കഴിഞ്ഞ 10 വർഷം കേരളത്തെ കരുതലോടെ നയിച്ചുവെന്നതോ പ്രതിസന്ധികളിൽ ചേർത്തുപിടിച്ചുവെന്നതോ കനത്ത തോൽവിയുടെ ഉത്തരവാദിത്തത്തിൽ നിന്ന് ഒഴിഞ്ഞുമാറാനുള്ള കാരണങ്ങളല്ലെന്ന് പാർട്ടിക്കുള്ളിലെ ഒരു വിഭാഗം ഒളിഞ്ഞും തെളിഞ്ഞും പറയുന്നു. 

1977-ന് ശേഷമുള്ള കേരള രാഷ്ട്രീയ ചരിത്രത്തിൽ സിപിഎമ്മിന് നേരിടേണ്ടി വന്ന ഏറ്റവും വലിയ തിരിച്ചടിയാണിത്. മത്സരിച്ച 75 സീറ്റുകളിൽ 25 ഇടത്ത് മാത്രമാണ് പാർട്ടി കഷ്ടിച്ച് വിജയിച്ചത്; 50 സിറ്റിംഗ് സീറ്റുകളിൽ പാർട്ടി തകർന്നടിഞ്ഞു.

പ്രചാരണ രീതിയും നേതൃത്വത്തിന് നേരെ വിമർശനവും

പിണറായി വിജയനെ മാത്രം മുൻനിർത്തിയായിരുന്നു എൽഡിഎഫ് ഇത്തവണ പ്രചാരണം നടത്തിയത്. നാടെങ്ങും പിണറായിയുടെ ഭീമൻ ഹോർഡിംഗുകളും സമൂഹമാധ്യമങ്ങളിൽ അദ്ദേഹത്തെ വാഴ്ത്തുന്ന പോസ്റ്റുകളുമായിരുന്നു നിറഞ്ഞത്. മറ്റ് മന്ത്രിമാരോ ഘടകകക്ഷി നേതാക്കളോ ചിത്രത്തിലില്ലാത്ത രീതിയിലുള്ള പ്രചാരണം എട്ടുനിലയിൽ പൊട്ടിയതോടെ പിണറായി വിജയനും എം വി ഗോവിന്ദനുമെതിരെ അതിരൂക്ഷമായ വിമർശനങ്ങളാണ് ഉയരുന്നത്. 

കണ്ണൂരിലെ മുതിർന്ന നേതാക്കളുടെ ഫേസ്ബുക്ക് പോസ്റ്റുകളിൽ പോലും നേതൃത്വത്തിനെതിരെയുള്ള 'കുത്തുകൾ' നിഴലിക്കുന്നുണ്ട്. ഭരണം നഷ്ടമായതോടെ ഇത്രയും കാലം അനുഭവിച്ചിരുന്ന ഇളവുകളും ചോദ്യം ചെയ്യപ്പെടാത്ത അധികാരവും പിണറായിക്ക് നഷ്ടമായേക്കാം.

മാധ്യമങ്ങളോടുള്ള അകൽച്ച വെല്ലുവിളിയാകും

പ്രതിപക്ഷ നേതാവായിരിക്കുമ്പോൾ മാധ്യമങ്ങളോട് നിരന്തരം പ്രതികരിക്കേണ്ടി വരും. ജനാധിപത്യപരമായ ഈ ആശയവിനിമയത്തിന് പിണറായി തയ്യാറായില്ലെങ്കിൽ പ്രതിപക്ഷത്തിൻ്റെ പ്രസക്തി തന്നെ ഇല്ലാതാകുമെന്ന് നിരീക്ഷകർ കരുതുന്നു. 

അദ്ദേഹം തന്നെ മുമ്പ് പറഞ്ഞതുപോലെ 'പഴയ വിജയനല്ല പുതിയ വിജയൻ' എന്ന രീതിയിലേക്ക് മാറിയില്ലെങ്കിൽ, സഭയിൽ വെറും മൂന്ന് അംഗങ്ങൾ മാത്രമുള്ള ബിജെപിക്ക് പ്രതിപക്ഷ സ്ഥാനം മുതലെടുക്കാൻ അവസരമൊരുക്കലായി ഇത് മാറും. കെ എൻ ബാലഗോപാൽ പ്രതിപക്ഷ ഉപനേതാവാകാൻ സാധ്യതയുണ്ടെങ്കിലും സിപിഐ ഈ പദവിക്കായി അവകാശവാദമുന്നയിക്കുന്നത് മുന്നണിക്കുള്ളിലെ ഭിന്നതയ്ക്ക് ആക്കം കൂട്ടുന്നു.

സഭയിലെ പുതിയ സമവാക്യങ്ങൾ

സാദാ എംഎൽഎയായി ഇരിക്കാൻ താൽപ്പര്യമില്ലാത്തതിനാലാണ് പിണറായി വിജയൻ പ്രതിപക്ഷ നേതാവിൻ്റെ റോൾ ഏറ്റെടുത്തതെന്നാണ് സൂചന. എന്നാൽ പുതിയ നിയമസഭയിൽ പിണറായിയെ നേരിടാൻ ഭരണനിരയിലുണ്ടാകുക ജി സുധാകരനും വി കുഞ്ഞികൃഷ്ണനും ടി കെ ഗോവിന്ദനുമാണ്. കൂടാതെ സ്പീക്കർ പദവിയിലേക്ക് യുഡിഎഫ് കെ കെ രമയുടെ പേര് ഉയർത്തുന്നതും വലിയ രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്. കാലത്തിൻ്റെ കാവ്യനീതി എന്നോണം പിണറായി വിജയന് നിയമസഭയിൽ പുതിയ വെല്ലുവിളികളെ നേരിടേണ്ടി വരുമെന്നുറപ്പാണ്.

ഈ രാഷ്ട്രീയ മാറ്റത്തെക്കുറിച്ചും പിണറായി വിജയൻ പ്രതിപക്ഷ നേതാവാകുന്നതിനെക്കുറിച്ചും നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: After a historic defeat in the 2026 Kerala Assembly elections, CPM has decided to appoint Pinarayi Vijayan as the Leader of the Opposition despite internal criticism and health concerns.

#PinarayiVijayan #CPMKerala #LDF #KeralaPolitics #LeaderOfOpposition #Assembly2026 #KeralaNews #BreakingNews #2026