Budget | റോഡ് വികസനത്തിന് മാത്രം 26,000 കോടി രൂപ! ബജറ്റിൽ ബിഹാറിനും ആന്ധ്രാപ്രദേശിനും വാരിക്കോരി സഹായം
പുതിയ വിമാനത്താവളങ്ങൾ, മെഡിക്കൽ കോളേജുകൾ, കായിക അടിസ്ഥാന സൗകര്യങ്ങൾ എന്നിവയും ബീഹാറിൽ നിർമിക്കും.
ന്യൂഡെൽഹി: (KVARTHA) മൂന്നാം മോദി സർക്കാരിന്റെ ആദ്യ ബജറ്റിൽ ബിഹാറിനും ആന്ധ്രാപ്രദേശിനും വാരിക്കോരി സഹായം. ബിഹാറിലെ റോഡ് വികസന പദ്ധതികൾക്കായി 26,000 കോടി രൂപ അനുവദിക്കുമെന്ന് ധനമന്ത്രി നിർമല സീതാരാമൻ ബജറ്റിൽ പ്രഖ്യാപിച്ചു. ഇത് പട്ന-പൂർണിയ എക്സ്പ്രസ് വേ, ബക്സർ-ഭഗൽപൂർ എക്സ്പ്രസ് വേ എന്നിവയുടെ വികസനത്തിന് വഴിയൊരുക്കും. ബോധ്ഗയ, രാജ്ഗിർ, വൈശാലി, ദർഭംഗ റോഡ് പദ്ധതികളും വികസിപ്പിക്കും. ബുക്സറിലെ ഗംഗാനദിയിൽ അധിക രണ്ടുവരി പാലം നിർമിക്കാനും ഇത് സഹായിക്കും.
21,400 കോടി രൂപ ചെലവിൽ ബീഹാറിൽ വൈദ്യുതി പദ്ധതികൾ ആരംഭിക്കും. പിർപൈന്തിയിൽ പുതിയ 2400 മെഗാവാട്ട് പ്ലാൻ്റ് സ്ഥാപിക്കുന്നതും ഇതിൽ ഉൾപ്പെടുന്നു. പുതിയ വിമാനത്താവളങ്ങൾ, മെഡിക്കൽ കോളേജുകൾ, കായിക അടിസ്ഥാന സൗകര്യങ്ങൾ എന്നിവയും ബീഹാറിൽ നിർമിക്കും. മൂലധന നിക്ഷേപങ്ങളെ പിന്തുണയ്ക്കാൻ അധിക വിഹിതം നൽകും. ബാങ്കുകളിൽ നിന്നുള്ള ബാഹ്യ സഹായത്തിനുള്ള ബീഹാർ സർക്കാരിൻ്റെ അഭ്യർത്ഥന വേഗത്തിൽ പ്രോസസ്സ് ചെയ്യുമെന്നും മന്ത്രി വ്യക്തമാക്കി.
ആന്ധ്രാപ്രദേശിന് സാമ്പത്തിക സഹായം
ആന്ധ്രാപ്രദേശ് പുനഃസംഘടനാ നിയമത്തിലെ പ്രതിജ്ഞാബദ്ധതകൾ നിറവേറ്റാൻ സർക്കാർ ശ്രമം നടത്തിയിട്ടുണ്ടെന്ന് ധനമന്ത്രി പറഞ്ഞു. ബഹുമുഖ വികസന ഏജൻസികൾ വഴി ആന്ധ്രാപ്രദേശിന് സാമ്പത്തിക സഹായം ലഭ്യമാക്കും. നടപ്പ് സാമ്പത്തിക വർഷം 15,000 കോടി രൂപയും വരും വർഷങ്ങളിൽ അധിക ഫണ്ടും നൽകും.
പോളവാരം ജലസേചന പദ്ധതി വേഗത്തിൽ പൂർത്തിയാക്കും. ഇത് നമ്മുടെ രാജ്യത്തെ ഭക്ഷ്യസുരക്ഷയിലും സഹായിക്കും. വിശാഖപട്ടണം-ചെന്നൈ വ്യാവസായിക ഇടനാഴിയിൽ കൊപ്പർത്തി മേഖലയിലെ അടിസ്ഥാന സൗകര്യങ്ങൾക്ക് ഊന്നൽ നൽകും. സാമ്പത്തിക വികസനത്തിന് മൂലധന നിക്ഷേപത്തിന് ഒരു വർഷം വരെ അധിക വിഹിതം നൽകും.രായലസീമ, പ്രകാശം, വടക്കൻ തീരദേശ ആന്ധ്രാപ്രദേശ് എന്നിവിടങ്ങളിലെ പിന്നാക്ക പ്രദേശങ്ങൾക്ക് ഗ്രാന്റ് അനുവദിക്കുമെന്നും ധനമന്ത്രി പ്രഖ്യാപിച്ചു.
