പ്ലസ് വണ്‍ വിദ്യാര്‍ത്ഥിനി തടാകത്തില്‍ മരിച്ച നിലയില്‍; കൂടെയുണ്ടായിരുന്ന യുവാവ് പോലീസ് പിടിയില്‍

പുല്‍പ്പള്ളി: പ്ലസ്‌വണ്‍ വിദ്യാര്‍ത്ഥിനിയായ പുല്‍പ്പള്ളി സ്വദേശിനിയെ കര്‍ണാടക ഗുണ്ടില്‍പേട്ടയിലെ  തടാകത്തില്‍ സംശയ സാഹചര്യത്തില്‍ മരിച്ച നിലയില്‍ കണ്ടെത്തി. സംഭവത്തില്‍ പെണ്‍കുട്ടിയുടെ കൂടെയുണ്ടായിരുന്ന യുവാവിനെ പോലീസ് കസ്റ്റഡിയിലെടുത്തു. പുല്‍പ്പള്ളി സ്വദേശിയായ യുവാവിനെയാണ് നാട്ടുകാര്‍ പിടികൂടി പോലീസിലേല്‍പിച്ചത്.

ആടിക്കൊല്ലി അമ്പത്താറ് മൂലേതറയില്‍ ദാസന്റെ മകള്‍ അനഘദാസാണ് (16) മരിച്ചത്. വെള്ളിയാഴ്ച രാവിലെ പത്തുമണിയോടെയാണ് ഗുണ്ടില്‍പേട്ട മദൂരിനടുത്തെ കക്കല്‍തൊണ്ടി തടാകത്തില്‍ പെണ്‍കുട്ടിയെ ദുരൂഹ സാഹചര്യത്തില്‍ മരിച്ചുകിടക്കുന്നത് നാട്ടുകാര്‍ കണ്ടത്. പെണ്‍കുട്ടിയെ ഇവിടേയ്ക്ക് ബൈക്കില്‍ കൊണ്ടുവന്ന പുല്‍പ്പള്ളി മാരപ്പന്‍മൂല പുലിക്കപറമ്പില്‍ മൂസയുടെ മകന്‍ അബ്ദുറഹ്മാനെ(23)യാണ് നാട്ടുകാര്‍ പിടികൂടിയത്. പിന്നീട് ഇയാളെ ഗുണ്ടല്‍പേട്ട പോലീസിന് കൈമാറുകയായിരുന്നു.

പുല്‍പ്പള്ളി കല്ലുവയല്‍ ജയശ്രീ ഹയര്‍ സെക്കന്‍ഡറി സ്‌കൂള്‍ വിദ്യാര്‍ത്ഥിനിയാണ് അനഘ. വെള്ളിയാഴ്ച രാവിലെ ഏഴരയോടെ സ്‌കൂളിലേക്കാണെന്ന് പറഞ്ഞ് വീട്ടിലേക്ക് പുറപ്പെട്ടതായിരുന്നു പെണ്‍കുട്ടി. അനഘ ചിറയില്‍ നീന്താനിറങ്ങിയപ്പോഴാണ് മരണപ്പെട്ടതെന്ന് അബ്ദുറഹ്മാന്‍ പോലീസിനോടു പറഞ്ഞു.

എന്നാല്‍ മരണത്തില്‍ ദുരൂഹത നിലനില്‍ക്കുന്നതിനാല്‍ പോലീസ് ഇയാളെ വിശദമായി ചോദ്യംചെയ്തുവരികയാണ്. സംഭവമറിഞ്ഞ് പെണ്‍കുട്ടിയുടെ ബന്ധുക്കളും നാട്ടുകാരും ഗുണ്ടല്‍പേട്ടിലെത്തി. അബ്ദുറഹ് മാന്‍ സിനിമാരംഗത്ത് പ്രവര്‍ത്തിക്കുന്നതായും ഇയാള്‍ക്ക് നിരവധി പെണ്‍കുട്ടികളുമായി സൗഹൃദം ഉണ്ടെന്നും പറയപ്പെടുന്നു. ദീപ്തിയാണ് അനഘയുടെ മാതാവ്. സഹോദരന്‍ അനന്തുദാസ്.