മന്ത്രവാദി ചമഞ്ഞ് തട്ടിപ്പ്: നാട്ടുകാര്‍ കള്ളന്റെ കൈ വെട്ടിമാറ്റി

വാരാണസി: മന്ത്രവാദി ചമഞ്ഞ് വിവാഹാലോചനയുമായെത്തിയ കള്ളനെ രോഷാകുലരായ ജനക്കൂട്ടം തല്ലിച്ചതച്ചതിനുശേഷം  കൈ വെട്ടി മാറ്റി. തിങ്കളാഴ്ച  രാത്രി യു.പിയിലെ ജോന്‍പൂരിലെ സര്‍പാത്തയിലാണ് സംഭവം. ബബ്‌ലു എന്ന ഗംഗുവിന്റെ കൈയാണ് നാട്ടുകാര്‍ വെട്ടിമാറ്റിയത്.

സര്‍പാത്തയിലെ രാമകൃഷ്ണ ബൈന്ദിന്റെ വീട്ടിലാണ് ഗംഗുവിന്റെ മോഷണ ശ്രമം നടന്നത്. രാമകൃഷ്ണ ബൈന്ദും ഭാര്യയും അമ്മയും  മൂന്നാണ്‍മക്കളും ഒരു മകളുമാണ് വീട്ടില്‍ താമസിക്കുന്നത്. ബൈന്ദിന്റെ മകന് വിവാഹലോചനയുമായെത്തിയ ഗംഗു  അത്താഴം കഴിഞ്ഞ് വിവാഹാലോചനക്കാര്യം പറഞ്ഞതോടൊപ്പം താനൊരു മന്ത്രവാദിയാണെന്ന കാര്യവും അറിയിച്ചു.

മകന്റെ  വിവാഹം പെട്ടെന്ന് നടക്കാനായി  മന്ത്രവാദം നടത്താമെന്നറിയിച്ച ഗംഗു അര്‍ദ്ധരാത്രിയില്‍ പൂജ കഴിഞ്ഞശേഷം പ്രസാദമായി വീട്ടുകാര്‍ക്ക് മയക്കുപൊടി വിതറിയ ഒരു ലഡു നല്‍കി. ലഡു കഴിച്ച വീട്ടുകാര്‍ മയങ്ങി വീണതിനെ തുടര്‍ന്ന്  ഗംഗുവും സഹായിയും ചേര്‍ന്ന് വീട്ടിലുള്ള പണവും സ്വര്‍ണ്ണവും കൈവശപ്പെടുത്തി മുങ്ങാന്‍ ശ്രമിക്കുകയായിരുന്നു.


ആ സമയത്താണ് മയങ്ങി വീണവരില്‍ ഒരാള്‍ ബോധം വീണതിനെ തുടര്‍ന്ന്
എഴുന്നേറ്റത്.  അയാള്‍ ബഹളം വെച്ചതിനെത്തുടര്‍ന്ന് അയല്‍ക്കാര്‍ ഓടിയെത്തുകയും വിവരമറിഞ്ഞ്  ഗംഗുവിനെയും സഹായിയെയും പിടിച്ചുവെച്ച് നന്നായി കൈകാര്യം ചെയ്യുകയും ചെയ്തു. തുടര്‍ന്ന് ഗംഗുവിന്റെ കൈവെട്ടുകയും ചെയ്തു.  സഹായി ഓടി രക്ഷപ്പെട്ടു.