ഭാര്യയെയും മൂന്ന് മക്കളെയും വെട്ടിക്കൊന്ന ഗൃഹനാഥനെ കണ്ടെത്താനായില്ല

പുത്തൂര്‍(ദക്ഷിണ കര്‍ണാടക): അധ്യാപികയായ ഭാര്യയെയും മൂന്നുമക്കളെയും വെട്ടിക്കൊന്ന് കടന്നുകളഞ്ഞ ഗൃഹനാഥനെ ഇനിയും കണ്ടെത്താനായില്ല.

പുത്തൂര്‍ താലൂക്കില്‍ കാക്കൂറിലെ അധ്യാപിക സന്ധ്യ. വി ഭട്ട്(45), മക്കളായ വേദ്യ(18), ഹരിഗോവിന്ദ ശര്‍മ്മ(15), വിനുത(12) എന്നിവരെയാണ് കുട്ടികളുടെ അച്ഛനായ വെങ്കിട്ടരമണഭട്ട് കൊലപ്പെടുത്തിയത്. മൂന്ന് പ്രത്യേക പോലീസ് സംഘമാണ് പ്രതിക്ക് വേണ്ടി തിരച്ചില്‍ നടത്തുന്നത്. കേരളത്തിലും മഹാരാഷ്ട്രയിലും ബാംഗ്ലൂരിലും തിരച്ചില്‍ തുടരുന്നുണ്ട്. പുത്തൂര്‍ എ.എസ്.പിയാണ് അന്വേഷണസംഘത്തിന്റെ തലവന്‍. അതിനിടെ പ്രതി ഉപയോഗിച്ചിരുന്ന മൊബൈല്‍ഫോണ്‍ സ്വിച്ച് ഓഫ് ചെയ്ത നിലയില്‍ കൊല നടന്ന വീട്ടിന് സമീപത്തുനിന്ന് കണ്ടെടുത്തു. അതേ സമയം പ്രതിയെ മംഗലാപുരം വിമാനത്താവളത്തില്‍ കണ്ടുവെന്ന അഭ്യൂഹത്തെ തുടര്‍ന്ന് പോലീസ് വിമാനത്താവളത്തില്‍ പരിശോധന നടത്തി.

കൊലയ്ക്ക് ശേഷം ഒളിവില്‍ പോയ വെങ്കിട്ടരമണഭട്ടുമായി ബന്ധമുണ്ടെന്ന് സംശയിച്ച ഒരു സ്ത്രീയെ അന്വേഷണം സംഘം ചോദ്യം ചെയ്തിരുന്നു. എന്നാല്‍ തനിക്ക് ഭട്ടുമായി യാതൊരുവിധ ബന്ധങ്ങളൊന്നുമില്ലെന്നും വിമല എന്ന സ്ത്രീ പോലീസില്‍ മൊഴി നല്‍കി. ചോദ്യം ചെയ്യലിന് ശേഷം വിമലയെ വിട്ടയച്ചു. ആവശ്യപ്പെടുമ്പോള്‍ അന്വേഷണം സംഘത്തിന് മുമ്പാകെ ഹാജരാകണമെന്ന ഉറപ്പിന്‍മേലാണ് വിമലയെ വിട്ടയച്ചത്.