Arrested | ഗുണ്ടാ സംഘങ്ങള്‍ തമ്മിലുള്ള പകപോക്കലിന്റെ ഭാഗമായി വാഹനം തല്ലിതകര്‍ത്തെന്ന കേസില്‍ രണ്ടു പേര്‍ അറസ്റ്റില്‍

കൂറ്റനാട്: (www.kvartha.com) ഗുണ്ടാ സംഘങ്ങള്‍ തമ്മിലുള്ള പകപോക്കലിന്റെ ഭാഗമായി വാഹനം തല്ലിതകര്‍ത്തെന്ന കേസില്‍
 രണ്ടു പേര്‍ അറസ്റ്റില്‍. കുന്നംകുളം കരിക്കാട് സ്വദേശികളായ നൗശാദ് (32), സവാദ് (30) എന്നിവരെയാണ് ചാലിശ്ശേരി സിഐ സതീഷ് കുമാറും സംഘവും അറസ്റ്റു ചെയ്തത്.

സംഭവത്തെ കുറിച്ച് പൊലീസ് പറയുന്നത്:

ചാലിശ്ശേരി പെരിങ്ങോട് സ്വദേശിയുടെ പരാതിയിലാണ് ഇരുവരെയും കസ്റ്റഡിയിലെടുത്തത്. മയക്കുമരുന്ന് വിഷയത്തിലടക്കം ഇവര്‍ തമ്മില്‍ വൈരാഗ്യമുള്ളതായി പറയുന്നു. അറസ്റ്റിലായ പ്രതികള്‍ പരാതിക്കാരന്റെ വീട്ടില്‍നിന്നും ബൈക് എടുത്ത് പൊതുറോഡില്‍ എത്തിച്ച് തല്ലി തകര്‍ക്കുകയും ഈ രംഗം ഫോണില്‍ പകര്‍ത്തി സമൂഹമാധ്യമങ്ങളില്‍ റീല്‍സായി പ്രചരിപ്പിക്കുകയും ചെയ്തുവെന്നാണ് പരാതി.

ഇത്തരത്തില്‍ വീണ്ടും ആവര്‍ത്തിക്കുമെന്ന് ആക്രോശിക്കുകയും ചെയ്തു. പ്രതികള്‍ നിരവധി കേസുകളില്‍ ജയില്‍ ശിക്ഷ അനുഭവിച്ചവരും കാപ ചുമത്തിയവരുമാണ്. എസ് ഐ ഋഷിപ്രസാദ്, ക്രൈം സ്‌കോഡ് അംഗങ്ങളായ അബ്ദുല്‍ റശീദ്, ജോളി, പ്രശാന്ത് തുടങ്ങിയവര്‍ സംഘത്തിലുണ്ടായിരുന്നു.