ടി.പി കേസിന്റെ ഗൂഢാലോചന: എടച്ചേരി പോലീസ് രമയുടെ മൊഴി എടുക്കും

തിരുവനന്തപുരം:  ടിപി വധത്തിന്റെ  ഗൂഢാലോചന കേസില്‍ എടച്ചേരി പോലീസ് തിരുവനന്തപുരത്ത് നിരാഹാര സമരം നടത്തിവരുന്ന കെകെ രമയുടെ മൊഴിയെടുക്കും. വടകര സിഐ ഉള്‍പ്പെടെയുള്ള മൂന്നംഗ സംഘമാണ് മൊഴിയെടുക്കാന്‍ തിരുവനന്തപുരത്ത് എത്തുന്നത്. ബുധനാഴ്ച ഉച്ചതിരിഞ്ഞ് ചേരുന്ന പോലീസ് ഉന്നതതല യോഗത്തിന് ശേഷമേ എപ്പോള്‍ മൊഴിയെടുക്കുമെന്ന കാര്യത്തില്‍ വ്യക്തമായ തീരുമാനം ഉണ്ടാകുകയുള്ളൂ.

ടി.പി കേസില്‍ ഉന്നത ഗൂഢാലോചന പുറത്തുവരണമെന്നാവശ്യപ്പെട്ട് രമ നല്‍കിയ  പരാതിയുടെ അടിസ്ഥാനത്തിലാണ് കോഴിക്കോട് എടച്ചേരി പോലീസ് കഴിഞ്ഞ ദിവസം ഗൂഢാലോചന കേസ് രജിസ്റ്റര്‍ ചെയ്തത്. ടിപി വധ ഗൂഢാലോചന കേസ് സിബിഐക്ക് കൈമാറുന്നതിന്റെ ആദ്യനടപടിയെന്ന നിലയ്ക്കാണ് പുതിയ കേസ് രജിസ്റ്റര്‍ ചെയ്തത്.

പിന്നീട്  കേസ് സിബിഐക്ക് കൈമാറും.

ഇതിനുള്ള നിര്‍ദേശം കോഴിക്കോട്
റൂറല്‍ എസ്പിക്ക് കൈമാറിയിട്ടുണ്ട്. അതേസമയം ടിപി വധക്കേസില്‍ സിബിഐ അന്വേഷണം ആവശ്യപ്പെട്ട് കെ.കെ. രമ നടത്തുന്ന നിരാഹാര സമരം മൂന്നാം ദിവസത്തിലേക്ക് കടന്നിരിക്കുകയാണ്.

സാമൂഹിക രാഷ്ട്രീയ മേഖലകളിലെ നിരവധി പ്രമുഖര്‍ രമയ്ക്ക് ഐക്യദാര്‍ഢ്യം അറിയിക്കാന്‍ സമരപ്പന്തലില്‍ എത്തുന്നുണ്ട്.
പര്‍ദ ധരിക്കാന്‍ ഭീഷണി: റയ്ഹാന കോടതിയില്‍ നേരിട്ടെത്തി കേസ് പിന്‍വലിച്ചു