Budget | സംസ്ഥാന ബജറ്റിന്റെ മുഴുവൻ വിവരങ്ങളും നിങ്ങളുടെ വിരൽ തുമ്പിൽ; എങ്ങനെ പരിശോധിക്കാമെന്ന് ഇതാ

കേരള ചരിത്രത്തിലെ ആദ്യ കടലാസ് രഹിത ബജറ്റാണ് ധനകാര്യ മന്ത്രി കെ എൻ ബാലഗോപാൽ 2022ൽ അവതരിപ്പിച്ചത്. അച്ചടിച്ച പുസ്തകത്തിന് പകരം ടാബ്‌ലറ്റ് ഉപയോഗിച്ചായിരുന്നു ബജറ്റവതരണം. 2023ലും ഇത് ആവർത്തിച്ചു. ഇത്തവണയും ബജറ്റ് കടലാസ് രഹിതമായിരിക്കുമെന്നാണ് വിവരം. വൻതോതിലുള്ള അച്ചടി ഒഴിവാക്കാനും കടലാസ്‌ രഹിത ബജറ്റ് എന്ന ആശയം നടപ്പാക്കാനുമാണ് എൻഐസിയുടെ സഹായത്തോടെ ‘കേരള ബജറ്റ്’ എന്ന ആപ്പ് രൂപകൽപന ചെയ്തത്.

എങ്ങനെ പരിശോധിക്കാം?

ബജറ്റ് അവതരണത്തിനുശേഷം മുഴുവൻ ബജറ്റ് രേഖകളും www(dot)budget(dot)kerala(dot)gov(dot)in എന്ന ലിങ്ക് മുഖേനയും ’kerala budget’ എന്ന ആപ്ലിക്കേഷനിലും ലഭിക്കും. ഗൂഗിൾ പ്ലേ സ്റ്റോറിൽ നിന്നും ആപ്പ് സ്റ്റോറിൽ നിന്നുംആപ്പ് ഡൗൺലോഡ് ചെയ്യാം. എല്ലാ 16 ബജറ്റ് രേഖകളും കാണാൻ ഈ ആപ്പ് സഹായിക്കുന്നു. കൂടാതെ മുൻകാലങ്ങളിലെ ബജറ്റുകളും വെബ്‌സൈറ്റിൽ ലഭ്യമാണ്.

1957 മുതലുള്ള ബജറ്റ് പ്രസംഗങ്ങളും രേഖകളും പോർട്ടലിൽ ലഭ്യമാണ്. പ്രധാന ബജറ്റ് സൂചകങ്ങൾ ചാർട്ടുകളും ഗ്രാഫുകളും ആയി അവതരിപ്പിക്കുന്ന ഉപയോക്തൃ-സൗഹൃദ ഇന്റർഫേസായിട്ടാണ് പോർട്ടൽ രൂപകൽപ്പന ചെയ്തിരിക്കുന്നത്. സാമ്പത്തിക വിദഗ്ധർക്കും പൊതുജനങ്ങൾക്കും ഉപകാരപ്പെടുന്ന തരത്തിലാണ് പോർട്ടൽ രൂപകൽപ്പന ചെയ്തിരിക്കുന്നതെന്ന് സർക്കാർ പറയുന്നു.