എമേര്‍ജിംഗ് കേരള; വിവാദങ്ങള്‍ വികസനത്തെ തകര്‍ക്കാന്‍; ടൂറിസം മന്ത്രി
Sep 10, 2012, 23:49 IST
പദ്ധതികളുമായി ബന്ധപ്പെട്ട പ്രശ്‌നങ്ങളെക്കുറിച്ച് സംവാദമാകാം. എന്നാല്‍ സംവാദം വിവാദത്തിലെത്തുമ്പോള്‍, വികസനം തകിടം മറിയും. ഇത് നല്ല പ്രവണതയല്ല. കേരള വികസനത്തെ പ്രതികൂലമായി ബാധിക്കുന്ന വിവാദങ്ങള്‍ പല പദ്ധതികളെയും അട്ടിമറിച്ചിട്ടുണ്ടെന്നും മന്ത്രി കൂട്ടിച്ചേര്‍ത്തു. പ്രകൃതിയെ സംരക്ഷിച്ചുകൊണ്ടുള്ള പദ്ധതികള്‍ മാത്രമേ ടൂറിസം മേഖലയില്‍ നടപ്പിലാക്കുകയുള്ളൂ എന്ന് മന്ത്രി വ്യക്തമാക്കി.
കണ്ണൂര്‍ ഗസ്റ്റ്ഹൗസ് പരിസ്ഥിതിയടക്കം എല്ലാ ആശങ്കയും പരിഹരിച്ചേ പദ്ധതിയുമായി മുന്നോട്ട് പോകൂ. പ്രകൃതി സൗന്ദര്യമാണ് കേരളത്തെ ലോക ടൂറിസത്തിന്റെ ശ്രദ്ധാകേന്ദ്രമാക്കുന്നത്. ടൂറിസത്തില്‍ കേരളത്തിന്റെ പ്രധാന ഇനവും പ്രകൃതിയാണ്. അതുകൊണ്ട് പരിസ്ഥിതിക്ക് കോട്ടം വരുന്ന ഒരു നടപടിയുമുണ്ടാവില്ല. എമേര്‍ജിംഗ് കേരളയില്‍ നിര്‍ദ്ദേശിക്കുന്ന പദ്ധതികള്‍ സംബന്ധിച്ച് ആര്‍ക്കും ആശങ്ക വേണ്ട. ഇക്കാര്യത്തില്‍ എല്ലാ വിഭാഗങ്ങളുമായി ചര്‍ച്ച നടത്തിയേ തീരുമാനമെടുക്കൂ. സര്‍ക്കാരിന്റെ ഭൂമി സംരക്ഷിച്ചുള്ള ടൂറിസം വികസനമാണ് ഉദ്ദേശിക്കുന്നതെന്നും അദ്ദേഹം പറഞ്ഞു.
കഴിഞ്ഞ ഇരുപത്തിയഞ്ചു വര്‍ഷമായി മാറി മാറി വന്ന സര്‍ക്കാരുകള്‍ കൈക്കൊണ്ട നല്ല നടപടികളാണ് കേരളത്തെ ലോക ടൂറിസം ഭൂപടത്തില്‍ പ്രമുഖ സ്ഥാനത്തെത്തിച്ചത്. കേരളം കാണാനെത്തുന്ന വിദേശ വിനോദ സഞ്ചാരികള്‍ ഇവിടത്തെ പ്രകൃതിയും സംസ്കാരവും തൊട്ടറിയാന്‍ ആഗ്രഹിക്കുന്നവരാണ്. അതിനാല്‍ പരിസ്ഥിയെ നിലനിര്‍ത്തിക്കൊണ്ടുള്ള വികസന പദ്ധതികളാണ് ഇവിടെ നടപ്പാക്കേണ്ടത് - മന്ത്രി പറഞ്ഞു.
കണ്ണൂരിലെ ധര്‍മ്മടം തുരുത്തില്‍ അനുയോജ്യമായ ടൂറിസം പദ്ധതി നടപ്പാക്കും. പദ്ധതി സംബന്ധിച്ച നിര്‍ദ്ദേശം വന്നാലുടന്‍ സര്‍വകക്ഷി യോഗം വിളിച്ചു ചേര്‍ത്ത് സമവായമുണ്ടാക്കിയാവും പദ്ധതി ആരംഭിക്കുക. മലബാറിലെ ഗസ്റ്റു ഹൗസുകളുടെ സൗകര്യം വര്‍ദ്ധിപ്പിക്കുന്നതിനു കൂടുതല്‍ കെട്ടിടങ്ങള്‍ നിര്‍മ്മിക്കുന്ന പദ്ധതിക്കാണ് കണ്ണൂരില്‍ ഇപ്പോള്‍ തുടക്കം കുറിക്കുന്നത്. താമസിയാതെ കോഴിക്കോടും കാസര്‍കോടും ഗസ്റ്റ്ഹൗസുകളില്‍ പുതിയ കെട്ടിടങ്ങള്‍ നിര്‍മിക്കുമെന്നും മന്ത്രി പറഞ്ഞു.
മൂന്നു നിലകളിലായി 16 മുറികളും കോണ്‍ഫറന്‍സ് ഹാളുമടങ്ങുന്നതാണ് പുതിയ ബ്ലോക്ക്. മൂന്നു കോടി രൂപയാണ് നിര്‍മാണ ചെലവ് പ്രതീക്ഷിക്കുന്നത്, കേരള പോലീസ് ഹൗസിംഗ് കണ്‍സ്ട്രക്ഷന്‍ കോര്‍പ്പറേഷനാണ് നിര്‍മാണ ചുമതല. ഒന്നരവര്‍ഷത്തിനകം നിര്‍മാണം പൂര്‍ത്തിയാക്കാനാണ് ലക്ഷ്യമിടുന്നത്.
Keywords: Tourist Minister A.P Anil Kumar, Kerala, Kannur, Emerging Kerala, Kasaragod, Kozhikode.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
