Criticized | ഭീകരാന്തരീക്ഷം സൃഷ്ടിച്ച് എല്‍ഡിഎഫും യുഡിഎഫും കണ്ണൂരില്‍ തിരഞ്ഞെടുപ്പ് അട്ടിമറിക്കാന്‍ ശ്രമിക്കുന്നുവെന്ന് അഡ്വ. കെ ശ്രീകാന്ത്

 
കണ്ണൂരില്‍ ബിജെപി ജില്ലാ കമിറ്റി ഓഫീസില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം. കണ്ണൂരിലെ തിരഞ്ഞെടുപ്പിന്റെ പൂര്‍ണ ചുമതല കേന്ദ്ര തിരഞ്ഞെടുപ്പ് കമീഷന്‍ ഏറ്റെടുക്കണം. ഇതിനായി നിവേദനം നല്‍കും. പൊലീസ് ഉദ്യോഗസ്ഥര്‍ പൂര്‍ണമായി തിരഞ്ഞെടുപ്പ് അട്ടിമറിക്കാനുള്ള ശ്രമത്തിന് കൂട്ടുനില്‍ക്കുകയാണെന്നും അദ്ദേഹം ആരോപിച്ചു.

സിപിഎമും കോണ്‍ഗ്രസും ഒരുപോലെയാണ് തിരഞ്ഞെടുപ്പ് അട്ടിമറിക്കാന്‍ ശ്രമിക്കുന്നത്. ഈ സാഹചര്യത്തില്‍ ജില്ലയില്‍ വ്യാപകമായ അക്രമം നടത്തി ഭീതിപരത്തി തിരഞ്ഞെടുപ്പ് അട്ടിമറിക്കാനാണ് സിപിഎം ശ്രമം. ഈ ഗൂഢാലോചനയുടെ ഭാഗമാണ് പാനൂരിലെ ബോംബ് സ്ഫോടനം. സിപിഎം ജില്ലാ നേതാക്കള്‍ അടക്കം അറിഞ്ഞുകൊണ്ടാണ് തിരഞ്ഞെടുപ്പ് അട്ടിമറിക്കാനുള്ള ശ്രമം നടത്തുന്നത്. ബോംബ് നിര്‍മാണ വിവരം അറിഞ്ഞിട്ടും പൊലീസ് റെയ്ഡ് നടത്തിയില്ല. പൊലീസിന്റെ വീഴ്ചയാണ് എല്ലാറ്റിനും കാരണമെന്നും ശ്രീകാന്ത് ആരോപിച്ചു.

ഒരുഭാഗത്ത് ഇങ്ങനെയുള്ള ശ്രമം സിപിഎം നടത്തുമ്പോള്‍ ഇതേ ശ്രമമാണ് കോണ്‍ഗ്രസില്‍ കെ സുധാകരന്റെ നേതൃത്വത്തില്‍ നടക്കുന്നത്. ദേശവിരുദ്ധ ശക്തികള്‍ ആയുധം ശേഖരിക്കുന്ന അവസ്ഥയാണ്. കോണ്‍ഗ്രസ് നേതാക്കള്‍ എസ് ഡി പി ഐ നേതാക്കളുമായി നേരത്തെ ധാരണ ഉണ്ടാക്കിയിട്ടുണ്ട്. ഇത് പുറത്തു വന്നപ്പോള്‍ അവരുടെ വോട് വേണ്ടായെന്ന് പറഞ്ഞ് ജനത്തിന്റെ കണ്ണില്‍ പൊടിയിടാനുള്ള ചെപ്പടിവിദ്യയാണ് നടത്തുന്നതെന്നും കെ ശ്രീകാന്ത് പറഞ്ഞു.