കോട്ടയത്ത് യുവതിയെ ആസിഡ് ഒഴിച്ചു കൊന്ന സംഭവം: യുവതി അറസ്റ്റില്‍

കോട്ടയം: കോട്ടയത്ത്  ലൈംഗിക തൊഴിലാളിയായിരുന്ന പത്തനംതിട്ട ളാഹ സ്വദേശിനി ശാലിനി ( 38)യെ ആസിഡ് ഒഴിച്ച് കൊലപ്പെടുത്തിയ സംഭവത്തില്‍ പ്രതിയായ യുവതി അറസ്റ്റില്‍. കോട്ടയം കഞ്ഞിക്കുഴിയില്‍ വാടകയ്ക്ക് താമസിക്കുന്ന രാധ(49) യാണ് കോട്ടയം വെസ്റ്റ് പോലീസിന്റെ  അറസ്റ്റിലായത്. വെള്ളിയാഴ്ച കോട്ടയത്തു വെച്ചാണ് രാധയെ അറസ്റ്റ് ചെയ്തത്. രാധയെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് കുറ്റം സമ്മതിച്ചത്.

തിരുവനന്തപുരം സ്വദേശിനിയായ രാധ പത്തുവര്‍ഷം മുമ്പ് കോട്ടയത്തെത്തി കഞ്ഞിക്കുഴിയില്‍ വാടകവീടെടുത്ത് താമസിച്ചുവരികയാണ്. കോട്ടയം ടൗണിലെ ലൈംഗിക തൊഴിലാളിയാണ് രാധ. അനാശാസ്യക്കേസില്‍ നിരവധി തവണ ഇവരെ പോലീസ് അറസ്റ്റ്് ചെയ്തിട്ടുണ്ട്.   വനിതാ പോലീസിനെ ആക്രമിച്ച കേസിലും രാധ പ്രതിയായിരുന്നു.

തൊഴില്‍ മേഖലയിലെ തര്‍ക്കമാണ് ശാലിനിയെ കൊലപ്പെടുത്താനിടയായത്. രാധ മദ്യപിച്ചെത്തിയാണ് അനാശാസ്യത്തിനായി യുവാക്കളെ കൊണ്ടുപോയിരുന്നത്. ശാലിനി ഇടപാടുകാരില്‍ നിന്നും 500 രൂപ മുതല്‍ 1,000 രൂപ വരെ ഈടാക്കുമ്പോള്‍ രാധ 300 രൂപ മുതല്‍ 500 വരെയായിരുന്നു ഈടാക്കിയിരുന്നത്. രാധ കുറച്ചു പണം വാങ്ങുന്നുവെന്നാരോപിച്ച് ശാലിനിയും രാധയും തമ്മില്‍ വഴക്കു കൂടുക പതിവായിരുന്നുവെന്ന് പോലീസ് അറിയിച്ചു.

ശാലിനി കൊല്ലപ്പെട്ടതിന് മിനിറ്റുകള്‍ക്കുള്ളില്‍ തന്നെ  കോട്ടയത്തും പരിസരപ്രദേശത്തുമുള്ള ലൈംഗിക തൊഴിലാളികളെയും  ഇടനിലക്കാരായി പ്രവര്‍ത്തിക്കുന്നവരെയും പോലീസ് കസ്റ്റഡിയിലെടുത്ത് ചോദ്യം ചെയ്തിരുന്നു.

രാധ

കൊല്ലപ്പെട്ട രാത്രി തന്നെ നഗരത്തിലെ ഓട്ടോ റിക്ഷക്കാരില്‍ നിന്നും മൊഴിയെടുത്ത് ശാലിനിയൊടൊപ്പം വയസ്‌കരക്കുന്നിലേക്ക് പോയ യുവാവിനെക്കുറിച്ചുള്ള വിവരം ലഭിച്ചു. ഇയാള്‍ പൊള്ളലേറ്റ് മെഡിക്കല്‍ കോളജിലുണ്ടെന്ന്  സ്ഥിരീകരിക്കുകയും ചെയ്തു. ഇതോടെ കേസിന് നിര്‍ണായകമായ തെളിവ് ലഭിക്കുകയായിരുന്നു.

പിന്നീട് പോലീസ് മെഡിക്കല്‍ കോളജിലെത്തി ഇയാളുടെ മൊഴിയെടുക്കുകയും ഷര്‍ട്ട് ധരിച്ചെത്തിയ സ്ത്രീയാണ് ആസിഡ് ഒഴിച്ചതെന്ന് വ്യക്തമാവുകയും ചെയ്തു. സംഭവത്തിന് ശേഷം രാധ മുങ്ങിയതോടെ ഇവര്‍ തന്നെയാണ് കൊലപാതകിയെന്ന് പോലീസ് കണ്ടെത്തുകയായിരുന്നു. തുടര്‍ന്ന് രാധയെ അറസ്റ്റു ചെയ്യുകയായിരുന്നു.
കാണാതായ യുവാവ് കടലില്‍ മരിച്ച നിലയില്‍