Order | സംസ്ഥാനത്തെ എല്ലാ പൊലീസ് ഉദ്യോഗസ്ഥര്‍ക്കും ഇത്തവണ ഓണം വീട്ടുകാര്‍ക്കൊപ്പം ആഘോഷിക്കാം; പ്രത്യേക ഉത്തരവിറക്കി ഡിജിപി
തിരുവനന്തപുരം: (KVARTHA) സംസ്ഥാനത്തെ എല്ലാ പൊലീസ് ഉദ്യോഗസ്ഥര്‍ക്കും ഇത്തവണത്തെ ഓണം വീട്ടുകാര്‍ക്കൊപ്പം ആഘോഷിക്കാം. ഇതുസംബന്ധിച്ച് പ്രത്യേക ഉത്തരവിറക്കി ഡിജിപി ഷെയ്ഖ് ദര്‍വേഷ് സാഹിബ്. സംസ്ഥാനത്തെ എല്ലാ ഉദ്യോഗസ്ഥര്‍ക്കും ആഘോഷത്തിന് അവസരം നല്‍കണമെന്നാണ് ഉത്തരവില്‍ പറയുന്നത്. ഡ്യൂട്ടി ക്രമീകരിക്കാന്‍ യൂനിറ്റ് മേധാവിമാര്‍ക്ക് നിര്‍ദേശം നല്‍കിയാണ് ഡിജിപി ഉത്തരവിറക്കിയിരിക്കുന്നത്.
ഇതു പൊലീസ് സേനയ്ക്ക് ഏറെ ആശ്വാസം ഉണ്ടാക്കും എന്ന കാര്യത്തില്‍ സംശയമില്ല. തിരുവോണത്തിന് ഇനി നാലു ദിസവമാണ് ശേഷിക്കുന്നത്. വരുംദിവസങ്ങളില്‍ പൊലീസുകാര്‍ക്ക് വീട്ടുകാര്‍ക്കൊപ്പം ഓണം ആഘോഷിക്കാനുള്ള ഡ്യൂട്ടി ക്രമീകരണങ്ങള്‍ ഷിഫ്റ്റ് അടിസ്ഥാനത്തില്‍ നടപ്പിലാക്കും.
പൊലീസുകാരില്‍ ജോലി സമ്മര്‍ദം വര്‍ധിക്കുന്നതും ആത്മഹത്യ പെരുകുന്നതും അടക്കം കഴിഞ്ഞ നിയമസഭാ സമ്മേളനത്തില്‍ വലിയ ചര്‍ച്ചയായിരുന്നു. വീട്ടിലെ സാധാരണ ചടങ്ങുകളില്‍ പോലും പങ്കെടുക്കാന്‍ പറ്റുന്നില്ലെന്ന പരാതി പൊലീസുകാര്‍ക്കിടയില്‍ ഉയരുകയും ചെയ്തിരുന്നു. ഇതിന് പിന്നാലെയുള്ള ഡിജിപിയുടെ പുതിയ ഉത്തരവ് വലിയ ശ്രദ്ധ നേടുന്നതാണ്.
കഴിഞ്ഞ ഏഴു വര്‍ഷത്തിനിടെ ആറായിരത്തോളം പൊലീസ് ഉദ്യോഗസ്ഥര്‍ മാനസിക സമ്മര്‍ദത്തിന് ചികിത്സ തേടിയതായും അഞ്ചു വര്‍ഷത്തിനിടെ 88 പൊലീസുകാര്‍ ആത്മഹത്യ ചെയ്തതായുമുള്ള റിപ്പോര്‍ട്ടുകള്‍ അടുത്തിടെ പുറത്തുവന്നിരുന്നു. പൊലീസ് സേനയിലെ പുരുഷ ഉദ്യോഗസ്ഥരും അവരുടെ കുടുംബാംഗങ്ങളും മദ്യപാനം, കുടുംബപ്രശ്‌നങ്ങള്‍ എന്നിവയുമായി ബന്ധപ്പെട്ടാണ് കൂടുതലും ഡോക്ടര്‍മാരെ സമീപിച്ചത്.
#KeralaPolice #Onam #PoliceWelfare #MentalHealth #KeralaNews #IndiaNews
