കൊച്ചി: (KVARTHA) മലയാള സിനിമയിലെ യുവ താരമായ ടൊവിനോ തോമസ് നായകനായെത്തുന്ന പുതിയ ചിത്രം 'ഐഡന്റിറ്റി'യുടെ ഫസ്റ്റ് ലുക്ക് പോസ്റ്റർ പുറത്തുവിട്ടു. തെന്നിന്ത്യൻ സിനിമയിലെ മുൻനിര നടിയായ തൃഷയാണ് ഈ ബിഗ് ബജറ്റ് ചിത്രത്തിൽ ടൊവിനോയുടെ നായികയായി എത്തുന്നത്.

'അജയന്റെ രണ്ടാം മോഷണം' എന്ന സൂപ്പർ ഹിറ്റ് ചിത്രത്തിന് ശേഷം ടൊവിനോ തോമസ് നായകനായി എത്തുന്ന ചിത്രമാണ് 'ഐഡന്റിറ്റി'. സെവൻത് ഡേ, ഫോറൻസിക് എന്നീ സൂപ്പർ ഹിറ്റ് ചിത്രങ്ങള്‍ക്ക് ശേഷം അഖില്‍ പോള്‍ - അനസ് ഖാൻ എന്നിവർ തിരക്കഥയെഴുതി സംവിധാനം ചെയ്യുന്ന ഈ ചിത്രം മലയാള സിനിമ പ്രേമികളിൽ വലിയ പ്രതീക്ഷകൾ സൃഷ്ടിച്ചിരിക്കുന്നു.

രാഗം മൂവീസിന്റെ ബാനറിൽ രാജു മല്ല്യത്താണ് 'ഐഡന്റിറ്റി' നിർമ്മിക്കുന്നത്. നമുക്ക് പാർക്കാൻ മുന്തിരിത്തോപ്പുകള്‍ പോലുള്ള മലയാള സിനിമയിലെ എക്കാലത്തെയും മികച്ച ക്ലാസിക് ചിത്രങ്ങൾ നിർമ്മിച്ച രാജു മല്ല്യത്ത് നിർമ്മിക്കുന്ന ചിത്രമെന്നതിനാൽ 'ഐഡന്റിറ്റി'ക്ക് പ്രേക്ഷകർ ഏറെ പ്രാധാന്യം നൽകുന്നു.

അഖില്‍ ജോർജ് ക്യാമറ ചലിപ്പിച്ച ചിത്രത്തിന്റെ എഡിറ്റിംഗ് നിർവഹിക്കുന്നത് ചമൻ ചാക്കോ ആണ്. ജേക്സ് ബിജോയ് ആണ് സംഗീത വിഭാഗം കൈകാര്യം ചെയ്യുന്നത്. കേരളം മാത്രമല്ല, രാജസ്ഥാൻ, ഗോവ, കർണാടക, തമിഴ്നാട് എന്നീ സംസ്ഥാനങ്ങളിലായാണ് 'ഐഡന്റിറ്റി'യുടെ ചിത്രീകരണം നടന്നത്.

ഡോക്ടർ, തുപ്പറിവാലൻ, ഹനുമാൻ എന്നീ സൂപ്പർ ഹിറ്റ് തെന്നിന്ത്യൻ സിനിമകളിലെ സുപ്രധാന വേഷങ്ങളിലൂടെ ശ്രദ്ധേയനായ താരം വിനയ് റായ്, ബോളിവുഡ് നടി മന്ദിര ബേദി, അജു വർഗീസ്, ഷമ്മി തിലകൻ, അർജുൻ രാധാകൃഷ്ണൻ, വിശാഖ് നായർ എന്നീ വൻ താര നിരയാണ് 'ഐഡന്റിറ്റി'യിൽ അണിനിരക്കുന്നത്. പിആർഒ - അരുണ്‍ പൂക്കാടൻ, ഡിജിറ്റല്‍ ആൻഡ് മാർക്കറ്റിംഗ് - അക്ഷയ് പ്രകാശ്, അഖില്‍ വിഷ്‌ണു വിഎസ്.

 #IdentityMovie, #TovinoThomas, #Trisha, #FirstLook, #MalayalamCinema, #NewRelease