Divorce | ഭാര്യ ആരതിയുമായി വേർപിരിയുന്നതായി പ്രഖ്യാപിച്ച് നടൻ  ജയം രവി; 'ഒരുപാട് ആലോചിച്ചെടുത്ത തീരുമാനം, സ്വകാര്യത മാനിക്കണം'

ചെന്നൈ: (KVARTHA) തമിഴ് സിനിമ താരം ജയം രവി ഭാര്യ ആരതിയുമായി വിവാഹബന്ധം വേർപെടുത്തുന്നതായി അറിയിച്ചു. ഈ തീരുമാനം ഒരുപാട് ആലോചനയ്ക്ക് ശേഷമാണെന്ന് അദ്ദേഹം പറഞ്ഞു. ഇതുസംബന്ധിച്ചുള്ള തമിഴിലും ഇംഗ്ലീഷിലുമുള്ള പ്രസ്താവന അദ്ദേഹം സാമൂഹ്യ മാധ്യമത്തിൽ പങ്കുവെച്ചു. ഈ പ്രയാസകരമായ സമയത്ത് ആരാധകർ സ്വകാര്യത മാനിക്കണമെന്നും അദ്ദേഹം അഭ്യർഥിച്ചു. 

മുൻപ്, ആരതി ഇൻസ്റ്റാഗ്രാമിൽ നിന്ന് ജയം രവിയുമൊത്തുള്ള ഫോട്ടോ നീക്കിയതിനെ തുടർന്ന് വിവാഹമോചനത്തെക്കുറിച്ചുള്ള വാർത്തകൾ പ്രചരിച്ചിരുന്നു. തന്റെ എക്സ് ഹാൻഡിൽ പോസ്റ്റ് പങ്കിട്ട ജയം രവി, ആരാധകരോടും മാധ്യമങ്ങളോടും നന്ദി പറഞ്ഞു. ഇപ്പോൾ ഒരു പ്രധാനപ്പെട്ട വ്യക്തിപരമായ വിവരം പങ്കിടേണ്ടി വന്നതിൽ സങ്കടമുണ്ട് എന്നും കുറിച്ചു.

'ഒരുപാട് ആലോചനകൾക്കും ചർച്ചകൾക്കും ശേഷം ആരതിയുമായുള്ള വിവാഹബന്ധം അവസാനിപ്പിക്കുക എന്ന ബുദ്ധിമുട്ടേറിയ തീരുമാനമെടുക്കുകയാണ്. ഇത് പെട്ടെന്നുണ്ടുന്നുണ്ടായതല്ല. വ്യക്തിപരമായ കാരണങ്ങളാണ് ഈ തീരുമാനത്തിന് പിന്നിൽ. എല്ലാവരുടേയും നല്ലതിനുവേണ്ടിയാണിത്', താരം വ്യക്തമാക്കി.

'ഈ സാഹചര്യത്തിൽ, ഞങ്ങളുടെ സ്വകാര്യതയും കുടുംബാംഗങ്ങളുടെ സ്വകാര്യതയും ബഹുമാനിക്കണമെന്ന് ഞാൻ നിങ്ങളോട് അഭ്യർഥിക്കുന്നു. ഈ വിഷയത്തിൽ അനാവശ്യമായ അഭ്യൂഹങ്ങളോ ആരോപണങ്ങളോ ഉണ്ടാക്കാതിരിക്കുക. കാര്യങ്ങൾ സ്വകാര്യമായി തുടരട്ടെ', താരം പോസ്റ്റ് ചെയ്തു. സിനിമകളിലൂടെ പ്രേക്ഷകരെ സന്തോഷിപ്പിക്കുക എന്നതാണ് തന്റെ പ്രധാന ലക്ഷ്യമെന്നും ആരാധകരുടെ പിന്തുണ തനിക്ക് വളരെ പ്രധാനമാണെന്നും അദ്ദേഹം കൂട്ടിച്ചേർത്തു.

ഈ വർഷം തുടക്കത്തിൽ, തങ്ങളുടെ വിവാഹബന്ധത്തിൽ പ്രശ്നങ്ങളുണ്ടെന്ന വാർത്തകൾ പ്രചരിച്ചതിനെ തുടർന്ന് ജയം രവിയും ആരതിയും വാർത്തകളിൽ നിറഞ്ഞിരുന്നു. 2009 ജൂണിൽ വിവാഹിതരായ ഇവർക്ക് ആരവ്, അയാൻ എന്നീ രണ്ട് ആൺമക്കളുണ്ട്. നിര്‍മാതാവായ സുജാത വിജയകുമാറിന്റെ മകളാണ് ആരതി.

#JayamRavi #Aarti #TamilCinema #Divorce #Bollywood