കൊച്ചി: (KVARTHA) ഉത്പാദന ചെലവും തൊഴിലാളികളുടെ കൂലിയിലുണ്ടായ വർദ്ധനവും പരിഗണിച്ച് പാൽ വില കാലോചിതമായി വർദ്ധിപ്പിക്കണമെന്ന് മിൽമ ഫെഡറേഷനോട് ആവശ്യപ്പെടാൻ മിൽമ എറണാകുളം മേഖല യൂണിയൻ ഭരണസമിതി തീരുമാനിച്ചതായി മേഖല ചെയർമാൻ സി എൻ വത്സലൻ പിള്ള അറിയിച്ചു. കഴിഞ്ഞ ദിവസം ചേർന്ന ഭരണസമിതി യോഗത്തിലെ തീരുമാനം മിൽമ ഫെഡറേഷന് സമർപ്പിച്ചെന്നും അദ്ദേഹം വ്യക്തമാക്കി.

പാൽ വില വർദ്ധിപ്പിക്കാനുള്ള അധികാരം മിൽമ ഫെഡറേഷനാണ്. അതിനാൽ, വില വർദ്ധനവ് നടപ്പാക്കുന്നതിന് ഫെഡറേഷനിൽ സമ്മർദ്ദം ചെലുത്തുമെന്നും ചെയർമാൻ പറഞ്ഞു. കേരളത്തിലെ ക്ഷീര കർഷകർക്ക് ഉത്പാദന ചെലവിനനുസരിച്ചുള്ള ന്യായമായ വില ലഭിക്കാത്തത് കാരണം ചെറുകിട കർഷകരും ഫാം ഉടമകളും ഉൾപ്പെടെ നിരവധി പേർ ഈ രംഗത്ത് നിന്ന് പിൻവാങ്ങുകയാണ്. ഇത് സംസ്ഥാനത്തെ പാൽ ഉത്പാദനത്തിൽ കാര്യമായ കുറവുണ്ടാക്കുന്നു. ആഭ്യന്തര ആവശ്യകത നിറവേറ്റാൻ മറ്റ് സംസ്ഥാനങ്ങളെ കൂടുതൽ ആശ്രയിക്കേണ്ട അവസ്ഥയാണ് നിലവിലുള്ളത്.

കാലാവസ്ഥാ വ്യതിയാനവും വിവിധ രോഗങ്ങളും കാരണം ക്ഷീര കർഷക മേഖല സാമ്പത്തികമായി വലിയ ബുദ്ധിമുട്ടിലാണ്. കർഷകർ നേരിടുന്ന മറ്റ് പ്രശ്നങ്ങളിലും സർക്കാർ സഹായം ലഭിച്ചില്ലെങ്കിൽ ഈ മേഖല വലിയ തകർച്ചയെ അഭിമുഖീകരിക്കേണ്ടി വരുമെന്നും സി എൻ വത്സലൻ പിള്ള കൂട്ടിച്ചേർത്തു.

കർഷകരെ ഈ മേഖലയിൽ പിടിച്ചു നിർത്തുന്നതിന് പാൽ വില ലിറ്ററിന് 10 രൂപയെങ്കിലും അടിയന്തരമായി വർദ്ധിപ്പിക്കണം എന്ന് ഭരണസമിതി യോഗം ആവശ്യപ്പെട്ടു. അതോടൊപ്പം ക്ഷീര കർഷക മേഖലയ്ക്ക് ഊന്നൽ നൽകുന്ന പദ്ധതികൾ സർക്കാർ ആസൂത്രണം ചെയ്ത് കർഷകരെ സഹായിക്കണമെന്നും യോഗം അഭ്യർത്ഥിച്ചു. ഈ ആവശ്യങ്ങൾ ഉടൻ തന്നെ മിൽമ ഫെഡറേഷന്റെ ശ്രദ്ധയിൽപ്പെടുത്തുമെന്നും ചെയർമാൻ അറിയിച്ചു.

Milma Ernakulam region has decided to urge the Milma Federation to increase milk prices by ₹10 per liter, citing rising production costs and increased wages for workers. The decision was taken at a recent administrative committee meeting. The chairman, C N Valsalan Pillai, stated that the federation will be pressured to implement the hike to support struggling dairy farmers in Kerala.

#MilkPriceHike #Milma #KeralaFarmers #DairySector #PriceIncrease #FarmersIssues