Cricket | മിന്നും ബൗളർ മുഹമ്മദ് ഷമിക്ക് ഫൈനലിന് മുമ്പ് സമ്മാനം പ്രഖ്യാപിച്ച് യു പി സർക്കാർ!

ലക്നൗ: (KVARTHA) ഇന്ത്യൻ ക്രിക്കറ്റ് ടീമിന്റെ മിന്നും ബൗളർ മുഹമ്മദ് ഷമിക്ക് ലോകകപ്പിലെ അവസാന മത്സരത്തിന് തൊട്ടുമുമ്പ് ഉത്തർപ്രദേശ് സർക്കാർ സമ്മാനം പ്രഖ്യാപിച്ചു. ന്യൂസിലൻഡിനെതിരായ സെമി ഫൈനൽ മത്സരത്തിൽ ഏഴ് വിക്കറ്റ് വീഴ്ത്തിയ ഷമിയുടെ ജന്മനാട്ടിൽ ക്രിക്കറ്റ് സ്റ്റേഡിയം നിർമിക്കുമെന്ന് യോഗി ആദിത്യനാഥ് സർക്കാർ അറിയിച്ചു.

ഉത്തർപ്രദേശിലെ അംരോഹ സ്വദേശിയാണ് മുഹമ്മദ് ഷമി. താരത്തിന്റെ ഗ്രാമമായ സഹസ്പൂർ അലിനഗറിൽ മിനി സ്റ്റേഡിയവും ഓപ്പൺ ജിമ്മും നിർമിക്കാൻ യുപി സർക്കാർ തീരുമാനിച്ചതായി അംരോഹ ജില്ലാ മജിസ്‌ട്രേറ്റ് രാജേഷ് ത്യാഗി പറഞ്ഞു. വെള്ളിയാഴ്ച, ജില്ലയിലെ ചീഫ് ഡെവലപ്‌മെന്റ് ഓഫീസറും (CDO) സംഘവും സ്ഥലത്തെത്തി സ്റ്റേഡിയത്തിനായി സ്ഥലം അളന്നു.

സർക്കാരിന്റെ കണക്കനുസരിച്ച് സഹസ്പൂർ അലിനഗറിൽ ഒരു ഹെക്ടറോളം സ്ഥലത്ത് സ്റ്റേഡിയം നിർമിക്കാനുള്ള തയ്യാറെടുപ്പുകൾ നടക്കുന്നുണ്ട്. ഈ സ്റ്റേഡിയത്തിൽ വിവിധ തരത്തിലുള്ള കായിക വിനോദങ്ങൾക്കുള്ള സൗകര്യം ഉണ്ടായിരിക്കും. പരിശീലനത്തിനുള്ള ക്രമീകരണങ്ങളും ഒരുക്കും. സമീപ ജില്ലകളിലുള്ള കളിക്കാർക്കും സ്റ്റേഡിയത്തിലെ സൗകര്യങ്ങൾ പ്രയോജനപ്പെടുത്താൻ കഴിയും.

ഈ ലോകകപ്പിൽ മികച്ച ഫോമിലാണ് മുഹമ്മദ് ഷമി. ടൂർണമെന്റിൽ ഇന്ത്യയുടെ ഏറ്റവും മികച്ച വിക്കറ്റ് വേട്ടക്കാരനാണ് അദ്ദേഹം, ആറ് മത്സരങ്ങളിൽ നിന്ന് 5.01 എന്ന ഇക്കോണമിയിൽ 23 വിക്കറ്റുകൾ നേടിയിട്ടുണ്ട്, ന്യൂസിലൻഡിനെതിരായ സെമി ഫൈനൽ മത്സരത്തിൽ ഏഴ് വിക്കറ്റ് വീഴ്ത്തി. ഞായറാഴ്ച ഓസ്‌ട്രേലിയയ്‌ക്കെതിരായ ഫൈനൽ മത്സരത്തിലും മുഹമ്മദ് ഷമി അടക്കമുള്ളവരിലാണ് രാജ്യത്തിന്റെ പ്രതീക്ഷ.


Keywords: News, National News, Cricket, Mohammed Shami, Final, UP government, yogi adityanath, cricket stadium, Semi Final, UP’s gift to Mohammed Shami: State government announces construction of new stadium in cricketer’s village.

< !- START disable copy paste -->