അരിയും ഗോതമ്പും അടക്കമുള്ള ഭക്ഷ്യധാന്യങ്ങൾ, പനീർ, ലസി, മോർ, പായ്ക് ചെയ്ത തൈര്, ഗോതമ്പ് പൊടി, തേൻ, പപ്പടം, മാംസം, മീൻ (ശീതീകരിച്ചത് ഒഴികെ), ശർക്കര തുടങ്ങിയ മുൻകൂട്ടി പാകേജ് ചെയ്ത ലേബലുകളുള്ള ഉൽപന്നങ്ങൾക്ക് വില കൂടും. അതായത് അവയുടെ നികുതി വർധിപ്പിച്ചു. അതേസമയം പാക് ചെയ്യാത്തതും ലേബൽ ചെയ്യാത്തതുമായ ഇനങ്ങൾ നികുതി രഹിതമാണ്.
വിലകൂടുന്നവ
ടെട്രാ പായ്ക് തൈര്, ലസി, ബടർ മിൽക് എന്നിവ വിലയേറിയതായിരിക്കും. ചെക് ബുക് നൽകുമ്പോൾ ബാങ്കുകൾ ഈടാക്കുന്ന ഫീസിന് ഇനി 18% ജിഎസ്ടി ബാധകമാകും. 5,000 രൂപയ്ക്ക് മുകളിൽ (ഐസിയു അല്ലാത്തത്) ആശുപത്രിയിൽ വാടകയ്ക്ക് എടുക്കുന്ന മുറികൾക്ക് അഞ്ച് ശതമാനം ജിഎസ്ടി ചുമത്തും.
ഇതുകൂടാതെ, മാപുകളും അറ്റ്ലസ് ഉൾപെടെയുള്ളവയ്ക്കും 12 ശതമാനം നിരക്കിൽ ജിഎസ്ടി ചുമത്തും.
പ്രതിദിനം 1000 രൂപയിൽ താഴെ വാടകയുള്ള ഹോടെൽ മുറികൾക്ക് 12 ശതമാനം ജിഎസ്ടി ചുമത്തും, ഇത് നേരത്തെ ബാധകമല്ലായിരുന്നു. എൽഇഡി വിളക്കുകൾക്ക് 18 ശതമാനം ജിഎസ്ടി ഈടാക്കും, അത് മുമ്പ് ബാധകമല്ലായിരുന്നു. ബ്ലേഡുകൾ, പേപർ കത്രിക, പെൻസിൽ ഷാർപനർ, സ്പൂണുകൾ, ഫോർക്ഡ് സ്പൂണുകൾ തുടങ്ങിയവയ്ക്ക് നേരത്തെ 12 ശതമാനം ജിഎസ്ടി ഏർപെടുത്തിയിരുന്നെങ്കിൽ ഇനിയത് 18 ശതമാനമാകും.
വിലകുറയുന്നവ
റോപ്‌വേ വഴിയുള്ള യാത്രക്കാരുടെയും ചരക്കുകളുടെയും ഗതാഗതം വിലകുറഞ്ഞതാകും, അതിന്റെ ജിഎസ്ടി നിരക്ക് 18 ശതമാനത്തിൽ നിന്ന് അഞ്ച് ശതമാനമായി കുറച്ചിരിക്കുന്നു. ശരീരത്തിന്റെ കൃത്രിമ ഭാഗങ്ങൾ, വൈകല്യം നികത്താൻ ശരീരത്തിൽ ധരിക്കുന്നതോ കൊണ്ടുപോകുന്നതോ ഘടിപ്പിച്ചതോ ആയ മറ്റ് ഉപകരണങ്ങൾ, ഇൻട്രാക്യുലർ ലെൻസുകൾ തുടങ്ങിയ സാധനങ്ങളുടെ ജിഎസ്ടി നിരക്ക് 12 ശതമാനത്തിൽ നിന്ന് അഞ്ച് ശതമാനമായി കുറച്ചു. അതിനാൽ ഇവയുടെ വില കുറയും. പ്രതിരോധ സേനയ്ക്കായി ഇറക്കുമതി ചെയ്യുന്ന ചില ഇനങ്ങളിൽ ജിഎസ്ടി ബാധകമല്ല. ചരക്ക് വാഹനങ്ങളുടെ വാടകയ്ക്ക് നിലവിലുള്ള 18 ശതമാനം ജിഎസ്ടി 12 ശതമാനമായി കുറയും.