സര്‍കാര്‍ ജോലി ലഭിക്കാന്‍ വാങ്കഡെ വ്യാജ രേഖകള്‍ ഉപയോഗിച്ചെന്ന് മഹാരാഷ്ട്ര മന്ത്രി നവാബ് മാലിക് ആരോപിച്ചിരുന്നു, അതിനുശേഷം നാര്‍കോടിക് കണ്‍ട്രോള്‍ ബ്യൂറോ ഉദ്യോഗസ്ഥന് കഴിഞ്ഞ നവംബറില്‍ താന്‍ ദളിതനാണെന്ന് തെളിയിക്കാന്‍ യഥാര്‍ത്ഥ ജാതി രേഖകള്‍ ദേശീയ പട്ടികജാതി കമീഷന് നല്‍കിയിരുന്നു.
നടന്‍ ശാരൂഖ് ഖാന്റെ മകന്‍ ആര്യന്‍ ഖാനെ മുംബൈ തീരത്തെ ഒരു ക്രൂയിസില്‍ നടത്തിയ റെയ്ഡിനിടെ വാങ്കഡെയും സംഘവും പിടികൂടിയിരുന്നു. എന്‍സിബിയുടെ മുംബൈ സോണിന്റെ തലവനായിരുന്ന വാങ്കഡെയാണ് കേസില്‍ പ്രാഥമിക അന്വേഷണം നടത്തിയത്. ആര്യന്‍ പിന്നീട് ജാമ്യത്തിലിറങ്ങി. 14 പ്രതികളെ ഉള്‍പെടുത്തി എന്‍സിബി 6,000 പേജുള്ള കുറ്റപത്രം വെള്ളിയാഴ്ച സമര്‍പിച്ചു. അതില്‍ ആര്യന്‍ ഖാന്റെ പേരില്ല, ആര്യനെതിരെ തെളിവ് ഹാജരാക്കാനായില്ല. ഇതോടെയാണ് വാങ്കഡെയ്ക്കെതിരെ നടപടിക്ക് നീക്കം നടക്കുന്നത്.
'ആര്യന്‍ ഖാനും മറ്റ് അഞ്ച് പേര്‍ക്കും ക്ലീന്‍ ചിറ്റ് ലഭിച്ചു. സമീര്‍ വാങ്കഡെയുടെ ടീമിനും സ്വകാര്യ സൈന്യത്തിനുമെതിരെ എന്‍സിബി നടപടിയെടുക്കുമോ? അതോ കുറ്റവാളികളെ സംരക്ഷിക്കുമോ?' നവാബ് മാലികിന്റെ ഓഫീസ് ട്വീറ്റ് ചെയ്തു.
മയക്കുമരുന്ന് ഉപഭോഗം തെളിയിക്കാന്‍ മെഡികല്‍ പരിശോധന നടത്തിയില്ല, ഒരു സാക്ഷി പോലും ഇല്ലായിരുന്നു, ശൂന്യമായ പേപറുകളില്‍ ഒപ്പിടാന്‍ പ്രേരിപ്പിച്ചു എന്നിങ്ങനെ പ്രത്യേക അന്വേഷണ സംഘത്തോട് രണ്ട് സാക്ഷികള്‍ വ്യക്തമാക്കിയിരുന്നു. പരിശോധന നടന്ന സമയത്ത് തങ്ങള്‍ അവിടെ ഉണ്ടായിരുന്നില്ലെന്നും ഇവര്‍ പറഞ്ഞു. ആര്യന്‍ ഖാന്റെ പക്കല്‍ മയക്കുമരുന്ന് ഇല്ലെന്ന് കണ്ടെത്തിയിട്ടും എല്ലാവരെയും ചേര്‍ത്ത് ഒരേ കുറ്റം ചുമത്തിയത് മറ്റൊരു ഗുരുതരമായ വീഴ്ചയാണെന്ന് എന്‍സിബി വൃത്തങ്ങള്‍ പറഞ്ഞു.