ശ്രീനഗര്‍: (www.kvartha.com 11.10.2021) കശ്മീരിലെ ബന്ദിപ്പോറ ജില്ലയിലെ ഷാഗുണ്ടില്‍ ടാക്‌സി ഡ്രൈവറെ വെടിവെച്ച് കൊലപ്പെടുത്തിയ സംഭവത്തില്‍ നാലു ഭീകരരെ അറസ്റ്റ് ചെയ്തതായി ജമ്മു കശ്മീര്‍ പൊലീസ് അറിയിച്ചു. ലശ്കര്‍ ഇ ത്വയ്യിബയുമായി ബന്ധമുള്ള ദ റെസിസ്റ്റന്‍സ് ഫ്രണ്ടിന്റെ ആസൂത്രകന്‍ ലാലാ ഉമറിന്റെ നിര്‍ദേശ പ്രകാരമാണ് മുഹമ്മദ് ശാഫിയെ വധിച്ചതെന്ന് അറസ്റ്റിലായവര്‍ മൊഴി നല്‍കിയതായി പൊലീസ് പറഞ്ഞു.
ഒക്ടോബര്‍ അഞ്ചിനാണ് ടാക്‌സി കാബ് ഡ്രൈവറായ മുഹമ്മദ് ശാഫി ലോണ്‍ വെടിയേറ്റ് മരിച്ചത്. അന്നേദിവസം മുഹമ്മദ് ശാഫിയെ കൂടാതെ ഫാര്‍മസി ഉടമയെയും തെരുവ് കച്ചവടക്കാരനെയും ഭീകരര്‍ കൊലപ്പെടുത്തിയതായി പൊലീസ് പറഞ്ഞു. ശ്രീനഗറിലെ ഇഖ്ബാല്‍ പാര്‍കിലെ പ്രമുഖ ബിസിനസുകാരനും ബിന്ദ്രു മെഡികേറ്റ് ഫാര്‍മസി ഉടമയുമായ മഖന്‍ ലാലിനെയും ലാല്‍ ബസാറിലെ തെരുവ് കച്ചവടക്കാരനായ വീരേന്ദര്‍ പാസ്വാനെയുമാണ് വധിച്ചത്.
കൊലപാതകത്തില്‍ കേസ് രെജിസ്റ്റര്‍ ചെയ്തതായും മറ്റ് പ്രതികള്‍ക്കായി അന്വേഷണം ആരംഭിച്ചതായും പൊലീസ് അറിയിച്ചു. ഒക്ടോബര്‍ ഒമ്പതിന് സുരക്ഷ സേനയുമായി ബന്ധമുണ്ടെന്ന് ആരോപിച്ച് മാജിദ് അഹമദ് ഗോജ്‌രി, മുഹമ്മദ് ശാഫി ദര്‍ എന്നിവരെ ഭീകരര്‍ കൊലപ്പെടുത്തിയിരുന്നതായി പൊലീസ് വ്യക്തമാക്കി.