നാഗ്പൂര്: (www.kvartha.com 31.10.2021) മഹാരാഷ്ട്രയിലെ നാഗ്പൂര് ജില്ലയില് പ്രായപൂര്ത്തിയാകാത്ത പെണ്കുട്ടിയെ ലോഡ്ജിലെത്തിച്ച് ലൈംഗികമായി പീഡിപ്പിച്ചെന്ന പരാതിയില് യുവാവിനെ പൊലീസ് അറസ്റ്റ് ചെയ്തു. രാംടെക് പട്ടണത്തിനടുത്തുള്ള ഗ്രാമവാസിയായ 21 കാരനാണ് പിടിയിലായത്.
കഴിഞ്ഞ ബുധനാഴ്ചയാണ് കേസിനാസ്പദമായ സംഭവം. ബുധനാഴ്ച, വൈകുന്നേരത്തോടെ പെണ്കുട്ടിയെ വീട്ടില് നിന്നും കാണാതായിരുന്നു. സമീപപ്രദേശങ്ങളില് തിരച്ചില് നടത്തിയെങ്കിലും കുട്ടിയെ കണ്ടെത്താനായില്ല. ഇതോടെ മാതാപിതാക്കള് പൊലീസില് പരാതി നല്കി.
പരാതിയുടെ അടിസ്ഥാനത്തില് പൊലീസ് തട്ടിക്കൊണ്ടുപോകലിന് കേസെടുത്ത് അന്വേഷണം നടക്കുന്നതിനിടെ വ്യാഴാഴ്ച പെണ്കുട്ടി വീട്ടില് തിരിച്ചെത്തി. രക്ഷിതാക്കള് അന്വേഷിച്ചപ്പോള് യുവാവ്, തന്നെ ലോഡ്ജിലേക്ക് കൊണ്ടുപോയി ലൈംഗികമായി പീഡിപ്പിക്കുകയായിരുന്നുവെന്ന് പെണ്കുട്ടി പറഞ്ഞു.
തുടര്ന്ന് പെണ്കുട്ടിയുടെ മൊഴിയുടെ അടിസ്ഥാനത്തില് പൊലീസ് പ്രതിയെ അറസ്റ്റ് ചെയ്യുകയായിരുന്നു. പ്രതിക്കെതിരെ പോക്സോ വകുപ്പുള്പെടെ ചുമത്തി കേസെടുത്തതായി പൊലീസ് അറിയിച്ചു.