ബെംഗ്ളൂറു: (www.kvartha.com 26.09.2021) വിനോദയാത്രയ്ക്കിടെ ബന്ധുക്കള്ക്കൊപ്പം നൃത്തം ചെയ്തതിന്റെ ഇഷ്ടക്കേടില് ഭാര്യയെ ഭര്ത്താവ് കുത്തിക്കൊന്നതായി പൊലീസ്. വിചിത്രമായ കാരണത്താല് ഭാര്യ രൂപ ജി എച്(32)നെ മൃഗീയമായി കുത്തിക്കൊന്ന കേസില് പ്രതിയായ കന്തരാജു(40)വിനെ പൊലീസ് അറസ്റ്റ് ചെയ്തു. ബെംഗ്ളൂറിലെ അന്നപൂര്ണേശ്വരി നഗറില് ബുധനാഴ്ച്ച വൈകുന്നേരമായിരുന്നു പരിസരവാസികളെ നടുക്കിയ സംഭവം.
രൂപയുടെ സഹോദരിയായ ലത എച് ജി അന്നപൂര്ണേശ്വരിനഗര് പൊലീസ് സ്റ്റേഷനില് നല്കിയ പരാതിയുടെ അടിസ്ഥാനത്തിലാണ് കന്തരാജുവിനെ അറസ്റ്റ് ചെയ്തത്. രൂപയുടെ മൃതദേഹം കണ്ടെടുക്കുമ്പോള് കഴുത്തില് ആഴത്തിലുള്ള നിരവധി മുറിവുകളുണ്ടായിരുന്നുവെന്ന് സഹോദരി പൊലീസിനോട് പറഞ്ഞു.
ദമ്പതികള് താമസിക്കുന്ന അന്നപൂര്ണേശ്വരിനഗറിലെ വീട്ടിലാണ് രക്തത്തില് കുളിച്ച നിലയില് രൂപയുടെ മൃതദേഹം കണ്ടെത്തിയത്. അറസ്റ്റിലായ ഭര്ത്താവ് കന്തരാജുവില് നിന്നും സ്ക്രൂഡ്രൈവര്, കത്തി, രണ്ട് മൊബൈല് ഫോണ്, ബൈക് എന്നിവയും പൊലീസ് പിടിച്ചെടുത്തിട്ടുണ്ട്. സംശയത്തെ തുടര്ന്നാണ് കന്തരാജു ഭാര്യയെ കൊലപ്പെടുത്തിയതെന്നാണ് പൊലീസിന്റെ പ്രാഥമിക നിഗമനം.