ശനിയാഴ്ച രാവിലെ 11 മണിയോടെയാണ് മദ്രാസ് ഐ.ഐ.ടിയിലെ ഹോസ്റ്റല് മുറിയില് തൂങ്ങിമരിച്ച നിലയില് ഫാത്തിമയുടെ മൃതദേഹം കണ്ടത്. രണ്ടാംകുറ്റി പ്രിയദര്ശനി ഗഗര് 173 കിലോന്തറയില് പ്രവാസിയായ അബ്ദുള് ലത്തീഫിന്റെയും സജിതയുടെയും മകളാണ്. ചെന്നൈ റോയല്പെട്ട് ഗവ. ആശുപത്രിയില് പോസ്റ്റ്മോര്ട്ടത്തിന് ശേഷം മൃതദേഹം ഞായറാഴ്ച്ച രാത്രി വീട്ടിലെത്തിച്ചു. തിങ്കളാഴ്ച്ച രാവിലെ സംസ്കാരം നടത്തും. അയിഷ ഇരട്ട സഹോദരിയാണ്. എട്ടാം ക്ലാസുകാരി മറിയം ഇളയ സഹോദരിയാണ്.
ക്രിസ്തുരാജ് എച്ച് എസ് എസില് നിന്നും ഗ്രേസ് മാര്ക്കില്ലാതെ 93.2 ശതമാനം മാര്ക്കോടെ പ്ലസ് ടു വിജയിച്ചതിന് ശേഷം എച്ച് എസ് ഇ ഇക്ക് ചേരുകയായിരുന്നു. സിവില് സര്വീസില് മികച്ച റാങ്ക് നേടി നല്ലൊരു ഐ എ എസ് ഉദ്യോഗസ്ഥയായി ജനങ്ങള്ക്ക് നല്ലതു ചെയ്യണമെന്നൊക്കെയുള്ള സ്വപ്നങ്ങളുമായാണ് ഫാത്തിമ എച്ച് എസ് ഇ ഇ കോഴ്സിന് ചേര്ന്നത്. പക്ഷെ, ഈ സ്വപ്നങ്ങളെല്ലാം വഴിയില് ഉപേക്ഷിച്ച് ഫാത്തിമ സ്വയം ജീവിതം അവസാനിപ്പിച്ചതിന്റെ അമ്പരപ്പിലാണ് ബന്ധുക്കളും നാട്ടുകാരും കൂട്ടുകാരും.
ഫാത്തിമയ്ക്ക് സി ബി എസ് ഇ പത്താം ക്ലാസ് പരീക്ഷയില് എല്ലാവിഷയങ്ങള്ക്കും എ വണ് ഉണ്ടായിട്ടും പ്ലസ് ടുവിന് ഹ്യൂമാനിറ്റീസ് എടുക്കാന് കാരണം സിവില് സര്വീസ് എന്ന സ്വപ്നലക്ഷ്യമായിരുന്നു.
അദ്ധ്യാപകരുടെ പീഡനമാണ് ഫാത്തിമയെ ആത്മഹത്യയിലേക്ക് നയിച്ചതെന്നാരോപണം ഉയരുന്നുണ്ട്. മുസ്ലീം സമുദായാംഗമായ ഫാത്തിമയ്ക്ക് അദ്ധ്യാപകര് ബോധപൂര്വ്വം ഇന്റേണല് മാര്ക്ക് കുറച്ചെന്നും ചില വിദ്യാര്ത്ഥികള് ജാതീയമായ പീഡനത്തിന് ഇരയാകുന്നതായും സഹപാഠികള് ബന്ധുക്കളോട് പറഞ്ഞു. മൃതദേഹം ഏറ്റുവാങ്ങാന് ചെന്നൈയിലെത്തിയ കുടുംബസുഹൃത്തുക്കളോട് ഫാത്തിമയുടെ സഹപാഠികളാണ് ഇക്കാര്യം തുറന്നുപറഞ്ഞത്. ഈ വര്ഷംമാത്രം മദ്രാസ് ഐ ഐ ടിയിലെ മൂന്ന് വിദ്യാര്ത്ഥികള് ആത്മഹത്യ ചെയ്തിരുന്നു.
Keywords: News, Kerala, Kollam, Student, Suicide, Hang Self, Civil Service, Muslim, Deadbody, Relatives, Friends, Teachers, Fatima Left Her Dream of Civil Service