കാസര്‍കോട്: പുനര്‍ വിവാഹത്തിനെത്തിയ സംഘത്തെ പോലീസ് കസ്റ്റഡിയില്‍ എടുത്തതിനെതുര്‍ന്ന് വരന്റെ അമ്മാവന്‍ കുഴഞ്ഞുവീണ് മരിച്ചു. ചന്തേര പോലീസ് സ്‌റ്റേഷന് സമീപം താമസിക്കുന്ന അബ്ദുല്‍ സലാം മൗലവി (62) ആണ് കുഴഞ്ഞുവീണ് മരിച്ചത്.അബ്ദുല്‍ സലാമിന്റെ 40 കാരനായ മരുമകനും കോളിയടുക്കത്തെ 20 കാരിയായ യുവതിയും തമ്മിലുള്ള വിവാഹം തിങ്കളാഴ്ച വൈകിട്ട് കോളിയടുക്കത്തെ പള്ളിയില്‍ നടുക്കേണ്ടതായിരുന്നു. ഒരു ടവേറ കാറിലാണ് വരനും ബന്ധുക്കളും എത്തിയത്. വിവാഹത്തിന് മുമ്പ് വരന്റെ മഹല്ല് ജമാഅത്തില്‍ നിന്നും കൊണ്ടുവന്ന കത്ത് സംശയംതോന്നി പരിശോധിച്ചപ്പോള്‍ കത്ത് വ്യാജമാണെന്ന് കണ്ടെത്തുകയും യുവാവ് ഇതിന് മുമ്പ് മറ്റ് മൂന്ന് പെണ്‍കുട്ടികളെ വിവാഹം കഴിച്ചിരുന്നതായി നാട്ടുകാരും വധുവിന്റെ ബന്ധുക്കളും നടത്തിയ അന്വേഷണത്തില്‍ കണ്ടെത്തുകയായിരുന്നു.
ഇതേതുടര്‍ന്ന് നാട്ടുകാര്‍ പോലീസില്‍ വിവരം അറിയിക്കുകയും വിവാഹത്തിന് വന്ന വരന്റെ ബന്ധുക്കളായ സ്ത്രീകളെ അടക്കം വിദ്യാനഗര്‍ പോലീസ് സ്റ്റേഷനിലേക്ക് പോലീസ് കൂട്ടികൊണ്ടുപോകുകയുമായിരുന്നു.
ഇവര്‍ വന്ന ടവേര കാറില്‍ തന്നെയായിരുന്നു സ്റ്റേഷനിലേക്ക് കൊണ്ടുവന്നത്. ഇവര്‍ വാഹനത്തില്‍ നിന്നും ഇറങ്ങുമ്പോഴാണ് അബ്ദുല്‍ സലാം മൗലവി കുഴഞ്ഞുവീണത്. ഉടന്‍തന്നെ അബ്ദുല്‍ സലാം മൗലവിയെ തൊട്ടടുത്ത കൃഷ്ണ ആശുപത്രിയില്‍ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.
Keywords: Kasaragod, Police, Marriage, Custody, Obituary, Kerala, Abdul Salam Moulavi, Malayalam News, Kerala Vartha