പാപ്പിനിശ്ശേരി : കഥാപ്രസംഗ വേദിയില്‍ ആരാധകരുടെ ഹൃദയം കവര്‍ന്ന രാജകുമാരിയായി മാറിയിരിക്കുകയാണ് കെ.കെ. ലിന്‍ഷ എന്ന ഏഴുവയസുകാരി. കഥാപ്രസംഗരംഗത്ത 103 വേദികള്‍ പിന്നിട്ട ഈ കൊച്ചുമിടുക്കി മൂന്ന് വര്‍ഷം കൊണ്ട് അഞ്ച് കഥകളാണ് അവതരിപ്പിച്ചത്.പാപ്പിനിശ്ശേരി ഇ.എം.എസ്. സ്മാരക ഹയര്‍സെക്കന്‍ഡറി സ്കൂളിന് സമീപം താമസിക്കുന്ന കെ.കെ.സുനില്‍ കുമാറിന്റെയും എം.ജിഷയുടെയും മകളാണ്. ചെറുകുന്ന് ബക്കീത്ത ഇംഗ്ലീഷ് മീഡിയം സ്കൂള്‍ മൂന്നാം ക്ലാസ് വിദ്യാര്‍ത്ഥിനിയാണ്. കാഥികനായ മുത്തച്ഛന്‍ കീഴറ കൃഷ്ണന്‍ മാസ്റ്ററുടെ കീഴില്‍ നാലു വയസുമുതല്‍ ലിന്‍ഷ കഥാപ്രസംഗം അഭ്യസിച്ചുവരികയാണ്.
സംഗീത സംവിധായകന്‍ എം.കെ.അര്‍ജുനന്‍ മാസ്റ്റര്‍ ആണ് കുട്ടിയുടെ താളബോധം കണ്ട് കഥാപ്രസംഗരംഗത്തേക്ക് കൈപിടിച്ചുയര്‍ത്തിയത്. താളബോധം കൊണ്ട് ആരാധകരെ കയ്യിലെടുക്കാന്‍ മിടുക്കിയാണ് ലിന്‍ഷ. കൊതുകുജന്യ രോഗങ്ങള്‍, എന്‍ഡോസള്‍ഫാന്‍, മദ്യവര്‍ജനം തുടങ്ങിയ അഞ്ച് കഥാപ്രസംഗങ്ങളും തയ്യാറാക്കിയിരിക്കുന്നത് മുത്തച്ഛനാണ്. കേരള സംഗീതനാടക അക്കാദമിയും മുംബൈ മലയാളി സമാജവും ലിന്‍ഷയെ ആദരിച്ചിട്ടുണ്ട്.
Keywords : School, Music Director, Daughter, Student, Child, Endosulfan, Mumbai, Malayalees, Kerala