KVARTHA: MALAYALAM NEWS | NEWS PAPER LIVE | KERALA | ENTERTAINMENT

എമിറേറ്റ്‌സ് ഐ.ഡി കാര്‍ഡിന് ജൂണ്‍ 30 വരെ അപേക്ഷിക്കാം

2012-06-02T16:00:00.000+05:30

ദുബൈ: എമിറേറ്റ്‌സ് ഐ.ഡി കാര്‍ഡ് റജിസ്‌ത്രേഷനുള്ള സമയം ജൂണ്‍ 30 വരെ നീട്ടിയതായി എമിറേറ്റ്‌സ് ഐ.ഡി കാര്‍ഡ് അതോറിറ്റി അറിയിച്ചു. മെയ് 31 ആയിരുന്നു നേരത്തെ നിശ്ചയിച്ച അവസാന ദിവസം. അപേക്ഷകരുടെ ബാഹുല്യവും സാധാരണ തൊഴിലാളികള്‍ക്കുള്ള വിഷമതകളും പിഴയൊടുക്കേണ്ടിവരുന്നതും ഒഴിവാക്കാനാണ് ഒരു മാസത്തേക്ക് കൂടി തിയതി നീട്ടിയത്.

നിശ്ചിത തിയതിക്കകം റജിസ്‌ത്രേഷന്‍ പൂര്‍ത്തിയാക്കാത്തവര്‍ക്ക് പ്രതിദിനം 20 ദിര്‍ഹം മുതല്‍ പരമാവധി 1000 ദിര്‍ഹം വരെ പിഴ ചുമത്തും. 3.3 ദശലക്ഷം പേര്‍ ഇതിനകം ഐ.ഡി കാര്‍ഡിന് അപേക്ഷിച്ചീട്ടുണ്ട്. അധികൃതരുടെ ഈ തീരുമാനം മലയാളികള്‍ ഉള്‍പ്പെടയുള്ള പ്രവാസികള്‍ക്ക് ആശ്വാസം പകരും. വിവിധ പ്രവാസി സംഘടനകള്‍ സര്‍ക്കാര്‍ തീരുമാനത്തെ സ്വാഗതം ചെയ്തു.

Keywords: Gulf, Dubai, Emirated Identity Authority, Card.

ഗള്‍ഫില്‍ നിന്നും തലാഖ് ചൊല്ലിയ യുവതിക്ക് ഭര്‍തൃവീട്ടില്‍ താമസിക്കാന്‍ കോടതി വിധി

2012-05-29T14:42:00.001+05:30

കുന്നംകുളം: തലാഖ് ചൊല്ലി വിവാഹബന്ധം വേര്‍പെടുത്തിയാലും ഗാര്‍ഹിക പീഢന നിരോധന നിയമപ്രകാരം ഭര്‍ത്താവിന്റെ വീട്ടില്‍ താമസിക്കാന്‍ ഭാര്യക്ക് അവകാശമുണ്ടെന്ന് കോടതി വിധിച്ചു. ഇസ്ലാമിക മത നിയമപ്രകാരം ഭാര്യയെ മൊഴി ചൊല്ലിയാല്‍ പിന്നെ ഭര്‍തൃവീട്ടില്‍ കഴിയാന്‍ പാടില്ല. ഇതിന് ഘടകവിരുദ്ധമായാണ് കോടതിവിധി പ്രസ്താവിച്ചിരിക്കുന്നത്.

പുന്നയൂര്‍ എടക്കര നീരാറ്റിപ്പറമ്പിലെ സുബൈദ എന്ന യുവതി നല്‍കിയ ഹര്‍ജിയിലാണ് കുന്നംകുളം മജിസ്ട്രേറ്റ് പി. സെയ്താലിയുടെ ഉത്തരവ്. ഭര്‍ത്താവ് അബ്ദുള്‍ലത്തീഫ് ഗള്‍ഫില്‍ നിന്നും തലാഖ് ചൊല്ലി വിവാഹബന്ധം വേര്‍പ്പെടുത്തുകയും അമ്മ അച്ചുട്ടിയോട് സുബൈദയെ വീട്ടില്‍ നിന്നും പുറത്താക്കാന്‍ ആവശ്യപ്പെടുകയുമായിരുന്നു.

എന്നാല്‍ ഗള്‍ഫിലുള്ള ഭര്‍ത്താവ് നല്‍കിയ തലാഖ് നിയമപ്രകാരമുള്ളതല്ലെന്ന് സുബൈദ കോടതിയില്‍ വാദിച്ചു.

ഭര്‍ത്താവിന്റെ വീട്ടില്‍ താമസിക്കുന്ന സുബൈദയെ ശല്യംചെയ്യരുതെന്ന് കോടതി ഉത്തരവില്‍ നിര്‍ദ്ദേശിച്ചു. സുബൈദയ്ക്കും മകള്‍ക്കും പ്രതിമാസം 5500 രൂപ ചെലവിനു നല്‍കാനും കോടതി ഉത്തരവിട്ടിട്ടുണ്ട്. അതേസമയം മകന്‍ തലാഖ് ചൊല്ലിയ സുബൈദയെ വീട്ടില്‍നിന്ന് പുറത്താക്കണമെന്ന് അബ്ദുള്‍ലത്തീഫിന്റെ മാതാവ് അച്ചുട്ടി നല്‍കിയ ഹര്‍ജി കോടതി തള്ളികളയുകയും ചെയ്തു.

Keywords: Kunnamkulam, Kerala, Gulf, Woman, Husband, Court Order

ദോഹയിലെ ഷോപ്പിംഗ് മാളില്‍ വന്‍അഗ്നിബാധ: 19 മരണം

2012-05-28T23:20:00.000+05:30

ദോഹ: ദോഹയിലെ പ്രശസ്ത ഷോപ്പിംഗ് മാളായ വില്ലാജിയോയിലുണ്ടായ അഗ്‌നിബാധയില്‍ 19 പേര്‍ വെന്തുമരിച്ചു. മരിച്ചവരില്‍ 13 പേര്‍ കുട്ടികളാണ്. നാല് അദ്ധ്യാപികമാരും 2 സുരക്ഷാ ഗാര്‍ഡുകളും മരിച്ചവരില്‍ ഉള്‍പ്പെടുന്നു. 17 പേര്‍ക്ക് പരിക്കേറ്റിട്ടുണ്ട്. പരിക്കേറ്റവരെ ഹമാദി വുമണ്‍സ് ഹോസ്പിറ്റലില്‍ അത്യാഹിത വിഭാഗത്തില്‍ പ്രവേശിപ്പിച്ചിരിക്കുകയാണ്. യൂറോപ്, ജപ്പാന്‍, സ്‌പെയിന്‍ തുടങ്ങിയ രാജ്യങ്ങളില്‍ നിന്നുള്ളവരാണ് മരിച്ചത്. മരിച്ച കുട്ടികളില്‍ ഒരു കുട്ടി സൗത്ത് ആഫ്രിക്കന്‍ സ്വദേശിയാണെന്ന് തിരിച്ചറിഞ്ഞിട്ടുണ്ട്. മാളിലെ കുട്ടികളുടെ നഴ്‌സറിയായ ജിമ്പാനീസില്‍ നിന്നും തീപടര്‍ന്നുപിടിച്ചതെന്നാണ് ഒടുവിലത്തെ റിപ്പോര്‍ട്ട്. അപകടത്തെ സംബന്ധിച്ച് അഭ്യന്തര വകുപ്പ് അധികൃതര്‍ നടത്തിയ വാര്‍ത്താസമ്മേളനത്തില്‍ ഷോപ്പിംഗ് മാളിന്റെ പ്രതിനിധികള്‍ പങ്കെടുക്കാത്തത് ഏറെ വിമര്‍ശനത്തിന് വഴിവച്ചിട്ടുണ്ട്. തീപടര്‍ന്നുപിടിക്കുമ്പോള്‍ മാളിലെ അപായ സൈറണ്‍ പ്രവര്‍ത്തിക്കാതിരുന്നത് ദുരന്തത്തിന്റെ തീവ്രത വര്‍ദ്ധിപ്പിച്ചതായി ആക്ഷേപമുണ്ട്.
(Updated)

ദോഹ: ദോഹയിലെ വന്‍കിട ഷോപ്പിംഗ് മാളായ വില്ലാജിയോയില്‍ വന്‍അഗ്നിബാധ. തിങ്കളാഴ്ച രാവിലെ 11 മണിയോടെയാണ് വ്യാപാര സമുച്ചയത്തിന്റെ ഒരുഭാഗം അഗ്നി വിഴുങ്ങിയത്. നിരവധിപേര്‍ മരിച്ചതായി അഭ്യൂഹമുണ്ടെങ്കിലും അധികൃതര്‍ ഇതുവരെ സ്ഥിരീകരിച്ചിട്ടില്ല. അഗ്നിബാധക്കിടയില്‍ മാളിലുണ്ടായിരുന്ന നൂറുകണക്കിന് ആളുകളെ ഫയര്‍ഫോഴ്‌സും പൊലീസും ദുരന്തനിവാരണ സേനയും ചേര്‍ന്ന് രക്ഷപ്പെടുത്തി.

മണിക്കൂറുകള്‍ക്കുള്ളില്‍ തീ നിയന്ത്രണവിധയമാക്കാന്‍ ഫയര്‍ഫോഴ്‌സിന് കഴിഞ്ഞു. നിരവധി സെക്യൂരിറ്റി ജീവനക്കാര്‍ക്ക് പൊള്ളലേറ്റതായി സൂചനയുണ്ട്. അഗ്നിബാധ സംബന്ധിച്ച് ഭീതിപരത്തുന്ന കുപ്രചരണങ്ങള്‍ നടത്തരുതെന്ന് അഭ്യന്ത്രമന്ത്രാലയം അഭ്യര്‍ത്ഥിച്ചു.

അഗ്നിപടരാന്നുള്ള കാരണം വ്യക്തമായിട്ടില്ല. മാളിലെ മൂന്നാം കവാടത്തിലാണ് തീ ആദ്യം കണ്ടത്. സ്ഥലത്തെ രണ്ട് കൂറ്റന്‍കടകള്‍ കത്തിയമര്‍ന്നു. വാട്ടര്‍തീം പാര്‍ക്കും സിനിമാശാലകളും നൂറുകണക്കിന് കടകളും മാളില്‍ പ്രവര്‍ത്തിക്കുന്നുണ്ട്. ഒരു ഫുഡ് കോര്‍ട്ടില്‍ നിന്നാണ് തീ പടര്‍ന്നതെന്നാണ് സൂചന. തീപിടുത്തം സംബന്ധമായ കൂടുതല്‍ വിവരങ്ങള്‍ വൈകിട്ട് നടക്കുന്ന വാര്‍ത്തസമ്മേളനത്തില്‍ വ്യക്തമാക്കുമെന്ന് അഭ്യന്ത്രമന്ത്രാലയവുമായി ബന്ധപെട്ട കേന്ദ്രങ്ങള്‍ അറിയിച്ചു.

Image courtesy: Doha News

Keywords: Doha, Villaggio Mall, Qatar, Fire.

പെട്രോള്‍ പമ്പില്‍ യുവതിക്ക് പ്രസവവേദന: ഹെലിക്കോപ്റ്ററില്‍ ആശുപത്രിയിലെത്തിച്ചു

2012-05-26T15:29:00.003+05:30

അബുദാബി: പെട്രോള്‍ പമ്പില്‍ വെച്ച് പ്രസവവേദന അനുഭവപ്പെട്ട വിദേശ യുവതിയെ അബുദാബി എയര്‍വിങ് പോലീസ് ഹെലിക്കോപ്റ്ററില്‍ ആശുപത്രിയിലെത്തിച്ചു. തലസ്ഥാന നഗരിയിലെ കോര്‍ണിഷില്‍ നിന്നും 140 കിലോ മീറ്റര്‍ അകലെയായിരുന്ന യുവതിയെ ആശുപത്രിയിലെത്തിക്കാന്‍ വേറെ മാര്‍ഗമൊന്നുമുണ്ടായിരുന്നില്ല. ആശുപത്രിയിലെത്തിച്ച് അധികം വൈകാതെ തന്നെ യുവതി കുഞ്ഞിന് ജന്മം നല്‍കി.

പടിഞ്ഞാറന്‍ പ്രവിശ്യയിലെ പെട്രോള്‍ പമ്പില്‍ വച്ചാണ് യുവതിക്ക് പ്രസവവേദന അനുഭവപ്പെട്ടത്. പുലര്‍ച്ചെ 2.17നാണ് പൊലീസ് കണ്‍ട്രോള്‍ റൂമില്‍ അടിയന്തര സഹായമാവശ്യപ്പെട്ട് സന്ദേശമെത്തിയത്. ഉടന്‍ തന്നെ ഹെലിക്കോപ്റ്റര്‍ അയച്ച് യുവതിയെ ആശുപത്രിയിലെത്തിക്കുകയായിരുന്നുവെന്ന് ഓപ്പറേഷന്‍ ഓഫീസര്‍ ലെഫ്റ്റനന്റ് മബ്‌ഖോത്ത് അല്‍ കാദിരി വ്യക്തമാക്കി.

Keywords: Abu Dhabi, Gulf, Petrol, Helicopter, Pregnant Woman

യെമന്‌ സൗദി അറേബ്യ 3.25 ബില്യണ്‍ ഡോളര്‍ സഹായം നല്‍കും

2012-05-23T21:57:00.000+05:30

റിയാദ്: യെമന്‌ സൗദി അറേബ്യ 3.25 ബില്യണ്‍ ഡോളര്‍ സഹായം നല്‍കും. സൗദി വിദേശകാര്യ മന്ത്രി സൗദ് അല്‍ ഫൈസല്‍ ആണ്‌ ഇക്കാര്യം അറിയിച്ചത്. യെമന്റെ സുരക്ഷയും സുസ്ഥിരതയും ഉറപ്പുവരുത്തി വികസന പദ്ധതികള്‍ക്ക് തുടക്കം കുറിക്കാനാണ്‌ സഹായം നല്‍കിയിരിക്കുന്നത്. യെമന്‍ മുന്‍പ്രസിഡന്റ് അലി അബ്ദുല്ല സാലേഹിനെ അധികാരഭ്രഷ്ടനാക്കാന്‍ നടത്തിയ പ്രക്ഷോഭത്തില്‍ കോടികളുടെ നാശനഷ്ടമാണ്‌ രാജ്യത്തുണ്ടായിട്ടുള്ളത്. രാജ്യത്തിന്റെ പുനര്‍ നിര്‍മ്മാണത്തിനായി യെമന്‍ പ്രസിഡന്റ് മുഹമ്മദ് ബാസിന്ദവ സുഹൃദ് രാജ്യങ്ങളുടെ സഹായമഭ്യര്‍ത്ഥിച്ചിരുന്നു.

English Summery

Riyadh - Saudi Arabia will give its impoverished neighbour Yemen aid worth $3.25 billion (Dh11 billion), Saudi Foreign Minister Prince Saud Al Faisal told a meeting in Riyadh on Wednesday, urging other nations to take similar steps.

ഒമാന്‍ സ്വദേശിയെ കൊല്ലപ്പെട്ട നിലയില്‍ കണ്ടെത്തി; ഒരാള്‍ അറസ്റ്റില്‍

2012-05-23T21:24:00.002+05:30

മസ്ക്കറ്റ്: ഒമാന്‍ സ്വദേശിയെ കൊല്ലപ്പെട്ട നിലയില്‍ കണ്ടെത്തി. റസ്താഖ് പ്രദേശത്തെ ഒഴിഞ്ഞ വീട്ടിലാണ് ഇയാളുടെ മൃതദേഹം കണ്ടെത്തിയത്. സംഭവത്തെതുടര്‍ന്ന്‌ ഒമാന്‍ പോലീസ് ഒരാളെ അറസ്റ്റ് ചെയ്തു. മദ്യലഹരിയില്‍ സുഹൃത്തുക്കള്‍ തമ്മിലുള്ള തര്‍ക്കമാണ്‌ കൊലപാതകത്തില്‍ കലാശിച്ചത്. പ്രതിയെ ദുഖാമില്‍ നിന്നുമാണ്‌ പോലീസ് അറസ്റ്റ് ചെയ്തത്.

English Summery
Muscat: Within 48 hours, the Royal Oman Police (ROP) have arrested an Omani accused in a murder case.

മദീനയില്‍ വാഹനമിടിച്ചു മലയാളി തീര്‍ഥാടകന്‍ മരിച്ചു

2012-05-23T00:41:00.000+05:30

മദീന: ഉം റ നിര്‍വഹിക്കാനായി കഴിഞ്ഞ ദിവസം മദീനയില്‍ എത്തിയ മലയാളി വാഹനമിടിച്ചു മരിച്ചു. പാലക്കാട് അലനെല്ലൂര്‍ സ്വദേശി തച്ചംപറ്റ മുഹമ്മദ്‌ കുട്ടി (60) ആണ് മരിച്ചത്.

മദീനയിലെ ചരിത്ര സ്ഥലങ്ങള്‍ സന്ദര്‍ശിക്കുന്നതിന്റെ ഭാഗമായി ഖുര്‍-ആന്‍ പ്രിന്റിംഗ് പ്രസ്സ്‌ സന്ദര്‍ശിച്ചു മടങ്ങുമ്പോള്‍ എതിരെ വന്ന വാഹനം ഇടിച്ചു വീഴ്ത്തുകയായിരുന്നു. സംഭവ സ്ഥലത്ത് വെച്ച് തന്നെ മരണം സംഭവിച്ചു. ഭാര്യ ആയിഷ വടക്കേതില്‍ കൂടെയുണ്ട്. നാല് മക്കളുണ്ട്. ജിദ്ദയിലുള്ള മകന്‍ ഫാറൂക്ക് എത്തിച്ചേരുന്നതോടെ ഖബറടക്കം മദീനയില്‍ നടക്കും.

കൂടെയുണ്ടായിരുന്ന പെരിന്തല്‍മണ്ണ താഴെക്കോട് ഹംസ ചെരങ്ങാത്തോടി എന്നയാളെ സാരമായ പരിക്കുകളോടെ കിംഗ്‌ ഫഹദ്‌ ആശുപത്രിയിലെ അത്യാഹിത വിഭാഗത്തില്‍ പ്രവേശിപ്പിച്ചു. ഇദ്ദേഹം അപകട നില തരണം ചെയ്തതായി ആശുപത്രി അധികൃതര്‍ പറഞ്ഞു.

മലപ്പുറം ആനക്കയത്തെ 'ബാക്ക ഉംറ ഗ്രൂപ്പിലാണ്' ഇവര്‍ ഉം റയ്ക്കെത്തിയത്. മരണാനന്തര കര്മ്മങ്ങള്‍ക്കായി അക്ബര്‍ ചാലിയം, അബ്ദുല്‍ ഹക്ക് തിരൂരങ്ങാടി, ബഷീര്‍ കൈപ്പുറം, മഹബൂബ് കീഴ്‌പറമ്പ്, മദീന കെ എം സി സി സാമൂഹിക ക്ഷേമ വിഭാഗം നേതാക്കളായ ശരീഫ്‌ കാസര്‍കോട്, നാദിര്‍ഷ തുടങ്ങിയവര്‍ രംഗത്തുണ്ട്.

English Summery

Accident killed Umrah pilgrim in Madeena

ഇടതുപക്ഷം ചരിത്രത്തിലെ ഏറ്റവും വലിയ പ്രതിസന്ധിയില്‍: മന്ത്രി മുനീര്‍

2012-05-23T00:27:00.000+05:30

മദീന: നിഷ്ഠൂരമായ കൊലപാതകങ്ങളിലൂടെ സ്വയം ശവക്കുഴി തോണ്ടുന്ന മാര്‍ക്സിസ്റ്റു പാര്‍ട്ടി അതിന്റെ ചരിത്രത്തിലെ ഏറ്റവും വലിയ പ്രതിസന്ധിയിലാണ് അകപ്പെട്ടിരിക്കുന്നതെന്ന് സംസ്ഥാന സാമൂഹിക ക്ഷേമ വകുപ്പ് മന്ത്രി ഡോക്ടര്‍ എം.കെ. മുനീര്‍. എതിരാളികളെ ആശയങ്ങള്‍ കൊണ്ട് നേരിടേണ്ടവര്‍ രാത്രിയുടെ മറവില്‍ കൊലക്കത്തിയുമായി ഭ്രാന്തു പിടിച്ച്‌ നടക്കുന്നത് പ്രബുദ്ധ കേരളത്തിന്‍റെ മനസ്സാക്ഷിയെ വെല്ലുവിളിച്ചുകൊണ്ടാണ്.

കണ്ണൂരിലെ ഷുക്കൂര്‍ വധം സംസ്ഥാനത്ത് കേട്ട് കേള്‍വിയില്ലാത്ത പാര്‍ട്ടി ഫാസിസത്തിന്‍റെ ഉത്തമ ഉദാഹരണമാണ്. തീര്‍ച്ചയായും മാര്‍ക്സിസ്റ്റ്‌ പാര്‍ട്ടി ഇതിനു വലിയ വില നല്‍കേണ്ടി വരും.

വികസനത്തിനും കരുതലിനും ഊന്നല്‍ നല്‍കിക്കൊണ്ടുള്ള നയങ്ങളുമായി യുഡിഎഫ് സര്‍ക്കാര്‍ മികച്ച പ്രവര്‍ത്തനമാണ് ഇപ്പോള്‍ കാഴ്ച വെക്കുന്നത്. പിറവത്തെ ജനങ്ങള്‍ നല്‍കിയ അംഗീകാരം നെയ്യാറ്റിന്‍കരയിലും ആവര്‍ത്തിക്കും. ഈ ഉപതെരഞ്ഞെടുപ്പോടെ എല്‍ഡിഎഫിന്റെ പ്രസക്തി തന്നെ നഷ്ടപ്പെടുന്നിടത്തേക്കാണ്‌ കാര്യങ്ങള്‍ എത്തിക്കൊണ്ടിരിക്കുന്നത്- അദ്ദേഹം പറഞ്ഞു.

ഉംറ കര്‍മ്മത്തിനിടെ മദീനയിലെത്തിയപ്പോള്‍ മദീന കെഎംസിസി നല്‍കിയ പൊതു സ്വീകരണത്തില്‍ സംസാരിക്കുകയായിരുന്നു അദ്ദേഹം.

മുസ്ലീം ലീഗിന്റെ വര്‍ധിച്ചു വരുന്ന ജനപിന്തുണയില്‍ അരിശം പൂണ്ടവരാണ് അക്രമത്തിലൂടെയും ദുഷ്പ്രചാരണങ്ങളിലൂടെയും ലീഗിനെതിരെ തിരിയുന്നതെന്ന് ചടങ്ങില്‍ സംസാരിച്ച കെഎം ഷാജി എംഎല്‍എ പറഞ്ഞു.

പരമാവധി വിവാദങ്ങളില്‍ നിന്നൊഴിഞ്ഞ്, പിന്നാക്ക ന്യൂനപക്ഷ സമുദായങ്ങളുടെയും കേരളത്തിന്റെ മൊത്തത്തിലുമുള്ള വികസനത്തിന് ഊന്നല്‍ നല്‍കാനാണ് ലീഗ് ശ്രമിക്കുന്നത്. എന്‍ജിനീയര്‍ അബ്ദുല്‍ സത്താറിന്റെ അധ്യക്ഷതയില്‍ നടന്ന ചടങ്ങില്‍ അഡ്വ. കെകെ സൈദലവി സംസാരിച്ചു. ബഷീര്‍ കൈപ്പുറം സ്വാഗതവും സുലൈമാന്‍ പണിക്കരപ്പുറായ നന്ദിയും പറഞ്ഞു. എന്‍ജിനീയര്‍ സൈദലവി, അബ്ദുള്ള വാഴക്കാട്, ഹുസൈന്‍ ചോലക്കുഴി എന്നിവര്‍ അതിഥികളെ ബൊക്കെ നല്‍കി സ്വീകരിച്ചു.

English Summery

LDF in critical stage says MK Muneer.

ബുര്‍ജ് ഖലീഫ ബോംബ് വച്ച്‌ തകര്‍ക്കുമെന്ന്‌ ഭീഷണിപ്പെടുത്തിയ ആളെ കോടതി വിട്ടയച്ചു

2012-05-21T13:22:00.001+05:30

ദുബായ്: ലോകത്തിലെ ഏറ്റവും ഉയരം കൂടിയ കെട്ടിടമായ ബുര്‍ജ് ഖലീഫ ബോംബ് വച്ച് തകര്‍ക്കുമെന്ന്‌ ഭീഷണിപ്പെടുത്തിയ ആളെ കോടതി നിരുപാധികം വിട്ടയച്ചു. ദുബായില്‍ ബിസിനസ് നടത്തുന്ന 38കാരനായ ഇന്ത്യക്കാരനെയാണ്‌ കോടതി വെറുതേ വിട്ടത്.

ഒരു മില്യണ്‍ ഡോളര്‍ നല്‍കിയില്ലെങ്കില്‍ ബുര്‍ജ് ഖലീഫ ബോംബ് വച്ച് തകര്‍ക്കുമെന്ന്‌ ദുബായ് പോലീസിലെ ഒരു ഉയര്‍ന്ന ഉദ്യോഗസ്ഥനാണ്‌ ഇയാള്‍ എസ്.എം.എസ് അയച്ചത്. സാമ്പത്തീക പ്രതിസന്ധിയാണ്‌ പ്രതിയെ അത്തരമൊരു നീക്കത്തിന്‌ പ്രേരിപ്പിച്ചതെന്ന കണ്ടെത്തലാണ്‌ കോടതിയെ ഈ തീരുമാനത്തിലെത്തിച്ചേരാന്‍ പ്രേരിപ്പിച്ചത്.

Keywords: Dubai, Gulf, Bomb, Court Order, Accused

സൗദിയില്‍ രണ്ട് പാക്കിസ്ഥാന്‍ സ്വദേശികളുടെ തലവെട്ടി

2012-05-20T22:14:00.000+05:30

റിയാദ്: ഇരട്ട കൊലപാതക്കേസില്‍ പ്രതികളായ രണ്ട് പാക്കിസ്ഥാന്‍ സ്വദേശികളുടെ തലവെട്ടി. ബഷീര്‍ അഫ്രീദി, റഹ്മാനുല്‍ വഹാബ് അബ്ദുല്ല എന്നിവരുടെ വധശിക്ഷയാണ്‌ മക്കയില്‍ നടപ്പിലാക്കിയത്. പാക്കിസ്ഥാന്‍ സ്വദേശിയായ മുഹമ്മദ് ഹാജിയെ കവര്‍ച്ചചെയ്ത് കൊലപ്പെടുത്തിയ കേസിലും മറ്റൊരു വിദേശ വനിതയെ കൊലപ്പെടുത്തിയ കേസിലുമാണ്‌ ഇരുവര്‍ക്കും വധശിക്ഷ വിധിച്ചത്.

English Summery

Riyadh: Saudi authorities on Sunday beheaded two Pakistanis in the holy city of Mecca after finding them guilty of two murders.

ബംഗ്ലാദേശിയെ അഞ്ച് കഷണമാക്കി അഴുക്കുചാലില്‍ തള്ളിയ 4 പേര്‍ അറസ്റ്റില്‍

2012-05-17T23:01:00.000+05:30

മസ്ക്കറ്റ്: ബംഗ്ലാദേശ് സ്വദേശിയെ കൊലപ്പെടുത്തി അഞ്ച് കഷണമാക്കി അഴുക്കുചാലില്‍ തള്ളിയ സംഭവവുമായി ബന്ധപ്പെട്ട് ഒമാന്‍ പോലീസ് 4 പേരെ അറസ്റ്റ് ചെയ്തു. സൂറിലെ അഴുക്കുചാലില്‍ നിന്നും അഞ്ച് പ്ലാസ്റ്റിക് ബാഗുകളിലാക്കിയ നിലയില്‍ ചൊവ്വാഴ്ചയാണ്‌ മൃതദേഹം കണ്ടെത്തിയത്. ചിറ്റഗോംഗിലെ സത്കനിയയില്‍ നിന്നുമാണ്‌ ഇയാള്‍ ഒമാനിലെത്തിയത്. എന്നാല്‍ ഇയാളെക്കുറിച്ചുള്ള പൂര്‍ണമായ വിവരങ്ങള്‍ ഇനിയും പോലീസ് പുറത്തുവിട്ടിട്ടില്ല. അറസ്റ്റിലായ 4 പേരും ബംഗ്ലാദേശ് സ്വദേശികളാണ്‌.

English Summery

Muscat: The Royal Oman Police (ROP) on Wednesday arrested four people on charges of a gruesome murder of a Bangladeshi national, whose body, cut into five pieces, was found in a drain in Sur on Tuesday.

സൗദിയില്‍ ഇംഗ്ലീഷ് തീയതികള്‍ ഉപയോഗിക്കുന്നതിന്‌ വിലക്ക്

2012-05-17T22:08:00.000+05:30

റിയാദ്: സൗദി അറേബ്യയില്‍ സര്‍ക്കാര്‍- സ്വകാര്യ സ്വകാര്യ സ്ഥാപനങ്ങളില്‍ ഇംഗ്ലീഷ് തീയതികള്‍ ഉപയോഗിക്കുന്നതിന്‌ വിലക്ക്. ഹോട്ടലുകളിലേയ്ക്കും കമ്പനികളിലേയ്ക്കും ഫോണ്‍ വിളിച്ചാല്‍ ഇംഗ്ലീഷ് ഭാഷയില്‍ മറുപടി പറയുന്നതിനും സൗദി വിലക്കേര്‍പ്പെടുത്തി. രാജ്യത്തെ എല്ലാ മന്ത്രാലയങ്ങളും ഓഫീസുകളും ഹിജറ തീയതികളും അറബി ഭാഷയും മാത്രമേ ഉപയോഗിക്കാവൂ എന്ന്‌ ആഭ്യന്തരമന്ത്രാലയം ഉത്തരവിട്ടു. ഹിജറ കലണ്ടറും അറബി ഭാഷയും പരിപോഷിപ്പിക്കുക എന്ന ലക്ഷ്യത്തോടെയാണ്‌ പുതിയ ഉത്തരവ് പ്രാബല്യത്തില്‍ വരുത്തുന്നത്.

English Summery

Dubai: Saudi Arabia has banned all government and private agencies from using the Gregorian dates in official dealings.

മക്ക രണ്ട് വര്‍ഷത്തിനുള്ളില്‍ സ്മാര്‍ട്ട് സിറ്റിയാകും

2012-05-17T10:30:00.000+05:30

റിയാദ്: പുണ്യനഗരമായ മക്കയെ രണ്ട് വര്‍ഷത്തിനുള്ളില്‍ സ്മാര്‍ട്ട് സിറ്റിയാക്കാനുള്ള പദ്ധതിക്ക് ഉടനെ തുടക്കം കുറിക്കും. പദ്ധതിയെക്കുറിച്ചുള്ള വിശദാംശങ്ങള്‍ സൗദി അധികൃതര്‍ വ്യക്തമാക്കി. ഹജ്ജ്, ഉംറ തീര്‍ത്ഥാടകര്‍ക്ക് മികച്ച സുരക്ഷയും ഗതാഗത സൗകര്യങ്ങളും പ്രദാനം ചെയ്യാനുദ്ദേശിച്ചാണ് മക്കയില്‍ സ്മാര്‍ട്ട് സിറ്റി പദ്ധതി ആദ്യം നടപ്പിലാക്കുന്നതെന്ന് മക്കാ ഗവര്‍ണ്ണര്‍ ഖാലിദ് രാജകുമാരാന്‍ വ്യക്തമാക്കി. തുടര്‍ന്ന് ജിദ്ദ, ത്വായിഫ് എന്ന നഗരങ്ങളില്‍ പദ്ധതി നടപ്പാക്കും. ലക്ഷകണക്കിന് തീര്‍ത്ഥാടകരെത്തുന്ന മക്കാ നഗരത്തിലെ മാലിന്യ പ്രശ്‌നങ്ങളും ട്രാഫിക്ക് കുരുക്കുകളും മറികടക്കുന്ന രീതിയിലുളള അത്യാധുനിക സാങ്കേതികവിദ്യകളുപയോഗിച്ചുളള നഗരനിര്‍മ്മാണമായിരിക്കും നടപ്പിലാക്കുക.

Keywords: Riyadh, Gulf, Mecca, Smart city

ഒമാനില്‍ മലയാളി ബാലിക നീന്തല്‍ കുളത്തില്‍ മുങ്ങിമരിച്ചു

2012-05-15T23:01:00.000+05:30

ദുബായ്: മലയാളി ബാലിക ഒമാനിലെ നീന്തല്‍കുളത്തില്‍ മുങ്ങിമരിച്ചു. പത്തനംതിട്ട സ്വദേശി സന്തോഷിന്റെ മകള്‍ അക്ഷയ (8)ആണ്‌ മുങ്ങിമരിച്ചത്.

English Summery

Malayali girl drowned dead in Oman

ദുബായിലെ സ്വകാര്യ സ്ക്കൂളുകള്‍ക്ക് അവധിദിനങ്ങളില്‍ സ്വയം തീരുമാനമെടുക്കാം

2012-05-13T09:49:00.000+05:30

ദുബായ്: ദുബായിലെ സ്വകാര്യ സ്ക്കൂളുകള്‍ക്ക് അവധിദിനങ്ങള്‍ സംബന്ധിച്ച് സ്വയം തീരുമാനം കൈക്കൊള്ളാമെന്ന്‌ കെ.എച്ച്.ഡി.എ. വിവിധ സ്ക്കൂളുകളുടെ ആവശ്യം പരിഗണിച്ചാണ്‌ കെ.എച്ച്.ഡി.എ തീരുമാനം കൈക്കൊണ്ടത്.

എന്നാല്‍ സ്ക്കൂളുകളുടെ പ്രവൃത്തിദിനങ്ങള്‍ സംബന്ധിച്ച് നിലവിലുള്ള നിയമങ്ങള്‍ പാലിക്കണമെന്നും കെ.എച്ച്.ഡി.എ (നോളഡ്ജ് ആന്റ് ഹ്യൂമന്‍ ഡവലപ്മെന്റ് അതോറിറ്റി) ചീഫ് മുഹമ്മദ് ദര്‍വിശ് അറിയിച്ചു.

English Summery

Dubai: Private schools in Dubai will be allowed to follow their own holiday calendars

പ്രവാസിയെ വിമാനത്തില്‍ മരിച്ച നിലയില്‍ കണ്ടെത്തി

2012-05-11T10:33:00.000+05:30

തിരുവനന്തപുരം: മസ്ക്കറ്റില്‍ നിന്നും തിരുവനന്തപുരത്തെത്തിയ വിമാനത്തില്‍ യാത്രക്കാരനായ പ്രവാസിയെ മരിച്ചനിലയില്‍ കണ്ടെത്തി. വിഴിഞ്ഞം സ്വദേശി ദാമോദരപ്പണിക്കര്‍ ആണ്‌ മരിച്ചത്.

English Summery

NRI found dead in flight.

അബുദാബി പോലീസ്‌ തേടിയ ഇന്ത്യക്കാരന്‍ ഒമാനില്‍ തൂങ്ങിമരിച്ചു

2012-05-10T22:55:00.000+05:30

മസ്ക്കറ്റ്: അബൂദാബി പോലിസ് തേടിയ ഇന്ത്യക്കാരന്‍ ഒമാനില്‍ തൂങ്ങിമരിച്ചു. തമിഴ്നാട് സ്വദേശിയായ ടി.എന്‍ ശ്രീനിവാസനാണ്‌ ഒമാനിലെ പോലീസ് ഹെഡ്ക്വാര്‍ട്ടേഴ്സില്‍ ആത്മഹത്യ ചെയ്തത്. അബൂദാബിയില്‍ പണമിടപാട് നടത്തി നിരവധി പേരെ വഞ്ചിച്ച കേസില്‍ പോലീസ് അന്വേഷിച്ചിരുന്ന ശ്രീനിവാസനെ മസ്ക്കറ്റ് എയര്‍പോര്‍ട്ടില്‍ നിന്നുമാണ്‌ പോലീസ് പിടികൂടിയത്. താന്‍സാനിയയില്‍ നിന്നും ചെന്നൈയിലേയ്ക്കുള്ള യാത്രാമദ്ധ്യേയാണ്‌ ഇയാള്‍ പിടിയിലായത്. ഏപ്രില്‍ 26ന്‌ ആത്മഹത്യ ചെയ്ത ശ്രീനിവാസന്റെ മരണവിവരം മേയ് അഞ്ചിനാണ്‌ ഇന്ത്യന്‍ എംബസി ബന്ധുക്കളെ അറിയിച്ചത്‌.

English Summery

Muscat: An Indian man wanted by Abu Dhabi Police hanged himself to death after he was held at the Muscat International Airport while on transit from Tanzania to Chennai.

മദ്യലഹരിയില്‍ സഹപ്രവര്‍ത്തകന്റെ ദേഹത്ത് തുപ്പിയ എം.പി സസ്‌പെന്‍ഷനില്‍

2012-05-10T18:57:00.000+05:30

മനാമ: മദ്യലഹരിയില്‍ പാര്‍ലമെന്റില്‍ എത്തുകയും സഹപ്രവര്‍ത്തകനായ എം.പിയുടെ ദേഹത്ത് തുപ്പുകയും ചെയ്ത എം.പിയെ കുവൈറ്റ് പാര്‍ലമെന്റ് സസ്‌പെന്‍ഡ് ചെയ്തു. മുഹമ്മദ് അല്‍ ജുവൈല്‍ ആണ് സസ്‌പെന്‍ഷന് വിധേയനായത്. ഇതിനുമുന്‍പും മുഹമ്മദ് അല്‍ ജുവൈല്‍ മദ്യപിച്ച് പാര്‍ലമെന്റില്‍ എത്താറുണ്ടെന്ന് സഹ എം.പിമാര്‍ ആരോപിച്ചു. എം.പി അഹമ്മദ് മാത്തറിന്റെ പരാതിയുടെ അടിസ്ഥാനത്തിലാണ് സസ്‌പെന്‍ഷന്‍.

Keywords: Manama, Gulf, Kuwait, Parliament, M.P, Split.

എയര്‍ ഇന്ത്യാ സമരം: മസ്‌ക്കറ്റില്‍ കുടുങ്ങിയ 100 യാത്രക്കാരില്‍ നിരവധി മലയാളികളും

2012-05-10T17:36:00.000+05:30

മസ്‌ക്കറ്റ്: എയര്‍ ഇന്ത്യാ സമരം ശക്തിയാര്‍ജ്ജിച്ചതോടെ കഴിഞ്ഞ മൂന്ന് ദിവസമായി മസ്‌ക്കറ്റില്‍ കുടുങ്ങിയ 100 യാത്രക്കാരില്‍ നിരവധി മലയാളികളും. മസ്‌ക്കറ്റിലെ ഹോട്ടലുകളില്‍ തങ്ങുന്ന യാത്രക്കാരെ വിവിധ വിമാനങ്ങളില്‍ നാട്ടിലേയ്ക്ക് അയക്കുമെന്ന് എയര്‍ ഇന്ത്യാ അധികൃതര്‍ അറിയിച്ചിട്ടുണ്ടെങ്കിലും ഇതുവരെ നടപടികളൊന്നും കൈക്കൊണ്ടിട്ടില്ലെന്ന് യാത്രക്കാര്‍ ആരോപിച്ചു. എന്നാല്‍ വ്യാഴാഴ്ച തിരിക്കുന്ന വിമാനത്തില്‍ കുറച്ച് യാത്രക്കാരെ നാട്ടിലെത്തിക്കുമെന്ന് അധികൃതര്‍ അറിയിച്ചു.

Keywords: Muscut, Air India, Passenger.

സ്വിസ്സ് ബഹുമതി യൂസഫലിക്ക് സമ്മാനിച്ചു

2012-05-04T13:00:00.001+05:30

സ്വിറ്റ്സര്‍ലാന്റ് സര്‍ക്കാരിന്റെ ബഹുമതിയായ സ്വിസ് അംബാസഡര്‍ അവാര്‍ഡ് യു.എ.ഇ.യിലെ സ്വിസ്സ് സ്ഥാനപതി വോള്‍ഫ് ഗാങ് ബ്രൂവല്‍ഹാര്‍ട്ടൈല്‍ നിന്നും എം.എ.യൂസഫലി സ്വീകരിക്കുന്നു.

അബുദാബി: പ്രമുഖ വ്യവസായിയും അബുദാബി ചേംബര്‍ ഓഫ് കോമേഴ്‌സ് ഡയറക്ടര്‍ ബോര്‍ഡംഗവുമായ എം.എ.യൂസഫലിക്ക് സ്വിറ്റ്‌സര്‍ലാന്‍ഡ് സര്‍ക്കാരിന്റെ ബഹുമതി സമ്മാനിച്ചു. അബുദാബി ഫെയര്‍മോണ്ട് ഹോട്ടലില്‍ നടന്ന പ്രൗഢഗംഭീരമായ ചടങ്ങില്‍ യു.എ.ഇ.യിലെ സ്വിറ്റ്‌സര്‍ലാണ്ട് സ്ഥാനപതി വോള്‍ഫ്ഗാങ് ബ്രൂവല്‍ഹാര്‍ട്ടാണ് ബഹുമതി സമ്മാനിച്ചത്.

ഗള്‍ഫിലെ പ്രമുഖ വ്യാപാര സ്ഥാപനമായ ലുലു ഹൈപ്പര്‍മാര്‍ക്കറ്റ് ശൃംഖല സ്വിറ്റ്‌സര്‍ലാന്‍ഡിലെ വാണിജ്യ മേഖലയ്ക്ക് നല്‍കുന്ന മികച്ച സംഭാവനകള്‍ക്കും, ഗള്‍ഫ് രാജ്യങ്ങളുമായുള്ള സൗഹൃദം പരിപോഷിപ്പിക്കുന്നതിന് യൂസഫലി വഹിക്കുന്ന പരിശ്രമങ്ങള്‍ക്കുമുള്ള അംഗീകാരമായാണ് സ്വിസ്സ് സര്‍ക്കാരിന്റെ ഈ ബഹുമതി.

യു.എ.ഇ. വിദേശകാര്യ മന്ത്രി ഷെയ്ഖ് അബ്ദുള്ള ബിന്‍ സായ്ദ് അല്‍ നഹ്യാന്‍, യു.എ.ഇ. ധനകാര്യ സഹമന്ത്രി ഒബൈദ് ഹുമൈദ് അല്‍ തായര്‍, ആദ്യമായി സൗരോര്‍ജ്ജം ഉപയോഗിച്ച് വിമാനം പറത്തിയ ഡോ: ബര്‍ട്രാണ്ട് പിക്കാര്‍ഡ്, സ്വിസ്സ് ബിസിനസ്സ് കൗണ്‍സിലിന്റെ വൈസ് പ്രസിഡണ്ടും, അല്‍ സുവൈദി കമ്പനിയുടെ എംഡിയുമായ മുഹമ്മദ് അല്‍ സുവൈദി എന്നിവരോടൊപ്പമാണ് യൂസഫലി അവാര്‍ഡ് സ്വീകരിച്ചത്. പ്രമുഖ അറേബ്യന്‍ ചിത്രകാരിയായ അസ്സ അല്‍ ഖുബൈസി രൂപകല്‍പന ചെയ്ത ശില്‍പവും ബഹുമതിപത്രവുമടങ്ങുന്നതാണ് അവാര്‍ഡ്.

സ്വിസ്സ് അവാര്‍ഡ് നേടിയ യു.എ.ഇ. ധനകാര്യ മന്ത്രി ഒബൈദ് ഹുമൈ അല്‍ തായര്‍, ആദ്യമായി സൌരോര്‍ജ്ജം ഉപയോഗിച്ച് വിമാനം പറത്തിയ ഡോ: ബര്‍ട്രാണ്ട് പിക്കാര്‍ഡ്, സ്വിസ്സ് ബിസിനസ്സ് കൌണ്‍സിലിന്റെ വൈസ് പ്രസിഡണ്ടും അല്‍ സുവൈദി കമ്പനിയുടെ എംഡി. മുഹമ്മദ് അല്‍ സുവൈദി, എം.എ.യൂസഫലി എന്നിവര്‍ സ്വിസ്സ് സ്ഥാനപതി വോള്‍ഫ്ഗാങ് ബ്രൂവ
ല്‍ഹാര്‍ട്ടിനോടൊപ്പം.

റാസല്‍ ഖൈമ ഭരണാധികാരി ശൈഖ് സൗദ് ബിന്‍ സഖര്‍ അല്‍ ഖാസിമി, യു.എ.ഇ വൈസ് പ്രസിഡണ്ടും പ്രധാനമന്ത്രിയും, ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മകൂമിന്റെ പത്‌നിയുമായ ഹയാ രാജകുമാരി, യു.എ.ഇ. വാണിജ്യ മന്ത്രി ലുബ്‌ന അല്‍ ഖാസിമി, യു.എ.ഇ. ഉന്നത വിദ്യാഭ്യാസ മന്ത്രി ശൈഖ് നഹ്യാന്‍ ബിന്‍ മുബാറക് അല്‍ നഹ്യാന്‍, എമിറേറ്റ്‌സ് ചെയര്‍മാന്‍ ശൈഖ് അഹമ്മദ് ബിന്‍ സയ്യിദ് അല്‍ മകും തുടങ്ങിയവര്‍ക്കായിരുന്നു മുന്‍ വര്‍ഷങ്ങളില്‍ ഈ ബഹുമതി ലഭിച്ചിരുന്നത്.

സ്വിസ് സര്‍ക്കാരിന്റെ ഈ ബഹുമതിയില്‍ ഏറെ സന്തോഷമുണ്ടെന്നും ഇത് മഹത്തായ ഒരു അംഗീകാരമായാണ് കണക്കാക്കുന്നതെന്നും, ഇതിന് സ്വിസ്സ് സര്‍ക്കാരിനോട് ഏറെ നന്ദിയുണ്ടെന്നും ഒരു പ്രതികരണത്തില്‍ ലുലു ഗ്രൂപ്പ് മാനേജിംഗ് ഡയറക് ടര്‍ എം.എ.യൂസഫലി പറഞ്ഞു. ഭാവിപ്രവര്‍ത്തനങ്ങള്‍ക്ക് കൂടുതല്‍ ഊര്‍ജ്ജം പകരുന്നതാണ് ഇതു പോലുള്ള അംഗീകാരമെന്നും അദ്ദേഹം കൂട്ടിച്ചേര്‍ത്തു.

Keywords: Swiss award, M.A.Yusufali, Abudhabi, Lulu Hyper Market, Gulf.

ദുബൈയില്‍ ഉരുവിന് തീപിടിച്ചു; വന്‍ നാശനഷ്ടം

2012-04-29T19:41:00.000+05:30

Photo: Haris Zeenath

ദുബൈ: ദേര ക്രീക്കില്‍ ഉരുവിന് തീപിടിച്ചു. വന്‍ നാശനഷ്ടം കണക്കാക്കുന്നു. ദുബൈ ക്രീക്കിലെ ഹില്‍ട്ടല്‍ ഹോട്ടലിന് എതിര്‍വശത്ത് വൈകിട്ട് മൂന്നരയോടെയാണ് തീ പിടിത്തം. ആളപായം റിപ്പോര്‍ട്ട് ചെയ്തിട്ടില്ല. ടയര്‍ റിമ്മുകള്‍ കയറ്റിയ ഉരുവാണ് കത്തിനശിച്ചതെന്ന് ദൃക്സാക്ഷികള്‍ പറഞ്ഞു.

തീപിടിച്ച ഉരുവിനടുത്ത് നിര്‍ത്തിയിട്ടിരുന്ന ഉരുക്കള്‍ പെട്ടെന്ന് മാറ്റിയതിനാല്‍ തീ പടരാതെ രക്ഷപ്പെട്ടു. കയറ്റിയയക്കാന്‍ വേണ്ടി കരയില്‍ അടുക്കി വച്ചിരുന്ന ഉരുപ്പടികളും കത്തിനശിച്ചിട്ടുണ്ട്. സമീപത്ത് പാര്‍ക്ക് ചെയ്തിരുന്ന വാഹനങ്ങള്‍ക്കും കേട്പാട് സംഭവിച്ചു.

രക്ഷാപ്രവര്‍ത്തനത്തിന് പോലീസും ഫയര്‍ ഫോര്‍സും അഗ്നി ശമന സേനയുടെ ബോട്ടും കുതിച്ചെത്തി. വിവരമറിഞ്ഞ് ക്രീക്കിന്റെ ഇരു വശത്തും വന്‍ ആള്‍ക്കൂട്ടമായിരുന്നു തടിച്ചുകൂടിയത്. വാഹന ഗതാഗതം ഏറെ നേരത്തേക്ക് വഴിതിരിച്ചുവിടുകയായിരുന്നു. ശക്തമായ കാറ്റ് രക്ഷാപ്രവര്‍ത്തനത്തെ ബാധിച്ചു.

Key words: Dhow, catches fire, Dubai Creek, UAE

73 യെമന്‍ സൈനീകരെ മോചിപ്പിച്ചതായി അല്‍ക്വയ്ദ

2012-04-28T22:49:00.001+05:30

സനാ: ബന്ദികളാക്കിയ 73 യെമന്‍ സൈനീകരെ മോചിപ്പിച്ചതായി അല്‍ക്വയ്ദ അറിയിച്ചു. അബിയാന്‍ പ്രവിശ്യയിലുണ്ടായ ഏറ്റുമുട്ടലിലാണ്‌ ഇവരെ അല്‍ക്വയ്ദ ബന്ദികളാക്കിയത്. അന്നുണ്ടായ ഏറ്റുമുട്ടലില്‍ 200ഓളം സൈനീകര്‍ കൊല്ലപ്പെട്ടിരുന്നു. ജാറിലെത്തുന്ന കുടുംബാംഗങ്ങള്‍ക്ക് സൈനീകരെ കൈമാറുമെന്ന്‌ അല്‍ക്വയ്ദ വക്താവ് അന്‍സാര്‍ അല്‍ ശരിയ്യ അറിയിച്ചു. സര്‍ക്കാര്‍ ജയിലില്‍ കഴിയുന്ന അല്‍ക്വയ്ദ തീവ്രവാദികളെ സ്വതന്ത്രരാക്കിയില്ലെങ്കില്‍ ഓരോ ആഴ്ചയിലും 10 സൈനീകരെ വീതം വധിക്കുമെന്ന്‌ അല്‍ക്വയ്ദ ഭീഷണിമുഴക്കിയിരുന്നു.

English Summery

Sana'a: Al Qaida-linked group that controls many towns in southern Yemen said on Saturday that it would set free 73 soldiers

ഷാര്‍ജയില്‍ 43 നില കെട്ടിടത്തില്‍ വന്‍ അഗ്നിബാധ; ആളപായമില്ല

2012-04-28T21:56:00.002+05:30

ദുബായ്: ഷാര്‍ജയിലെ അല്‍ നഹ്ദ പാര്‍ക്കിനു സമീപത്തെ അല്‍ തായെര്‍ ടവറില്‍ വന്‍ അഗ്നിബാധ. ശനിയാഴ്ച പുലര്‍ച്ച 2.30ഓടെയാണ്‌ കെട്ടിട സമുച്ചയത്തില്‍ തീപടര്‍ന്നത്. അഗ്നിബാധയുടെ കാരണം വ്യക്തമല്ല. പ്രവാസികളും സ്വദേശികളുമടക്കം നിരവധി കുടുംബങ്ങളാണ്‌ ഈ കെട്ടിടത്തില്‍ താമസിച്ചിരുന്നത്. അഗ്നിശമന സേനയും പോലീസും അഞ്ച് മണിക്കൂര്‍ കിണഞ്ഞുശ്രമിച്ചതിനുശേഷമാണ്‌ അഗ്നി നിയന്ത്രണവിധേയമായത്. ഭാഗ്യവശാല്‍ അത്യാഹിതങ്ങളൊന്നും റിപോര്‍ട്ട് ചെയ്തിട്ടില്ല. കെട്ടിടത്തിന്റെ ഒന്നാം നിലയില്‍ നിന്നുമാണ്‌ തീ പടര്‍ന്നുപിടിച്ചതെന്ന്‌ ദൃക്സാക്ഷി വെളിപ്പെടുത്തി.

അഗ്നിപടര്‍ന്നയുടനെ അപായ സൈറണ്‍ മുഴങ്ങിയെങ്കിലും ആദ്യം ആരും കാര്യമായെടുത്തില്ലെന്നും ഇയാള്‍ പറഞ്ഞു. എന്നാല്‍ പിന്നീട് അപകടം തിരിച്ചറിഞ്ഞ താമസക്കാര്‍ കുടുംബാഗങ്ങളുമായി പുറത്തേയ്ക്ക് പായുകയായിരുന്നു. ചിലര്‍ പാസ്പോര്‍ട്ടും മറ്റും എടുത്ത് പുറത്തുകടന്നപ്പോള്‍ എല്ലാം നഷ്ടപ്പെട്ട നിരവധി താമസക്കാരും കൂട്ടത്തില്‍ ഉണ്ടായിരുന്നു. പലരും രാത്രിമുഴുവന്‍ ചിലവഴിച്ചത് സമീപത്തെ പാര്‍ക്കിലാണ്‌. ചിലര്‍ തൊട്ടടുത്ത ഫ്ലാറ്റുകളിലും സുഹൃത്തുക്കളുടെ കുടുംബങ്ങളിലും അഭയം തേടി. ഷാര്‍ജയിലെ തന്നെ 25 നില കെട്ടിടത്തിലുണ്ടായ അഗ്നിബാധയ്ക്ക് ശേഷം 65 ദിവസം പിന്നിട്ടപ്പോഴാണ്‌ അടുത്ത അഗ്നിബാധയുണ്ടായത്. അന്ന്‌ 125 കുടുംബങ്ങള്‍ക്കാണ്‌ എല്ലാം നഷ്ടപ്പെട്ടത്.

Keywords: Sharjah, Dubai, Fire, Malayalam news.

22കാരന്‍ ഒരു ദിവസം രണ്ട് പെണ്‍കുട്ടികളെ വിവാഹം കഴിച്ച് ചരിത്രം സൃഷ്ടിച്ചു

2012-04-27T15:56:00.000+05:30

സമറ (ഇറാഖ്): ഇരുപത്തിരണ്ടുകാരനായ അബ്ദുള്‍ റഹ്മാന്‍ നയെഫ് അല്‍ ഉബൈദി ഒരേ ദിവസം രണ്ട് കാമുകിമാരെ വിവാഹം കഴിച്ചു.

പടിഞ്ഞാറന്‍ തിക്രത്തിലാണ്‌ രസകരമായ ഈ സംഭവം അരങ്ങേറിയത്. തന്റെ അടുത്ത ബന്ധുക്കളുടെ മക്കളായ ഇന്‍ തിദാര്‍ (17), സൗദ് (22) എന്നിവരുമായി അബ്ദുള്‍ റഹ്മാന്‍ പ്രണയത്തിലായിരുന്നു. അബ്ദുള്‍ റഹ്മാന്റെ വീട്ടില്‍ വച്ചുനടന്ന വിവാഹ സല്‍ക്കാരത്തില്‍ ഇരുവധുക്കളുടേയും ബന്ധുക്കളും സുഹൃത്തുക്കളും പങ്കെടുത്തു.

Keywords: Iraq, World, Marriage, Two women

റാസല്‍ ഖൈമയില്‍ ലുലുവിന്റെ നൂറാമത് സ്‌റ്റോര്‍ പ്രവര്‍ത്തനമാരംഭിച്ചു

2012-04-27T12:39:00.000+05:30

റാസല്‍ ഖൈമ: പ്രമുഖ ഹൈപ്പര്‍ മാര്‍ക്കറ്റ് ശൃംഖലയായ ലുലുവിന്റെ നൂറാമത് സ്‌റ്റോര്‍ റാസല്‍ ഖൈമയില്‍ പ്രവര്‍ത്തനമാരംഭിച്ചു. യുഎഇ സുപ്രീം കൗണ്‍സില്‍ അംഗവും റാസല്‍ ഖൈമ ഭരണാധികാരിയുമായ ഹിസ് ഹൈനസ് ശെയ്ഖ് സൗദ് ബിന്‍ സഖര്‍ അല്‍ ഖാസിമിയാണ് ഉല്‍ഘാടനം നിര്‍വ്വഹിച്ചത്. റാസല്‍ ഖൈമ കിരീടധാരി ശെയ്ഖ് നഹ്‌യാന്‍ ബിന്‍ മുബാറക് അല്‍ നഹ്‌യാന്‍, ലുലു ഗ്രൂപ്പ് മാനേജിംഗ് ഡയറക്ടര്‍ എം.എ യൂസഫലി, ഉന്നത വിദ്യാഭ്യാസശാസ്ത്ര ഗവേഷണ മന്ത്രി ശെയ്ഖ് അലി അല്‍ ഹാശ്മി, മതകാര്യ ഉപദേഷ്ടാവ് ശെയ്ഖ് ഫൈസല്‍ ബിന്‍ സഖര്‍ അല്‍ ഖാസിമി, റാസല്‍ ഖൈമ ഫിനാന്‍സ് ഡിപാര്‍ട്ട്‌മെന്റ് ചെയര്‍മാന്‍, റാസല്‍ ഖൈമ ഫ്രീ ട്രേഡ് സോണ്‍ അതോറിറ്റി ചെയര്‍മാന്‍, ടവര്‍ ലിങ്ക്‌സ് ഗോള്‍ഫ് ക്ലബ് ചെയര്‍മാന്‍, ഇന്ത്യന്‍ അംബാസഡര്‍ എം.കെ ലോകേഷ്, തുടങ്ങി നിരവധി പേര്‍ ഉല്‍ഘാടന വേളയില്‍ സന്നിഹിതരായിരുന്നു.
മൂന്ന് നിലകളിലായി സ്ഥിതിചെയ്യുന്ന റാക് മാള്‍ അന്താരാഷ്ട്ര നിലവാരത്തിലാണ് സജ്ജീകരിച്ചിരിക്കുന്നത്. ഫുഡ് കോര്‍ട്ട്, കോഫീ ഷോപ്പ്, മണി എക്‌സ്‌ചേഞ്ച്, തുടങ്ങി നിരവധി സൗകര്യങ്ങള്‍ മാളില്‍ ഒരുക്കിയിട്ടുണ്ട്. വിനോദത്തിനായി 22,000 ചതുരശ്ര അടി, 5,000 ചതുരശ്ര അടി ഐസ് റിങ്ക്, പ്രാര്‍ത്ഥനാലയം തുടങ്ങിയവയും മാളിലുണ്ട്.

Keywords: Ras al Khaimah, LuLu hypermarket, Shaikh Mohammad Saud Bin Saqr Al Qasimi