കളിമണ്ണ് ശ്വേതയുടെ പ്രസവം കാണിക്കാനുള്ള ചിത്രമല്ല: ഭാഗ്യലക്ഷ്മി

കൊച്ചി: വിവാദചിത്രമായ കളിമണ്ണ് ശ്വേതാ മേനോന്റെ പ്രസവം കാണിക്കാന്‍ വേണ്ടി നിര്‍മ്മിച്ച ചിത്രമല്ലെന്ന് പ്രശസ്ത ഡബ്ബിംഗ് ആര്‍ട്ടിസ്റ്റ് ഭാഗ്യലക്ഷ്മി. മാതൃത്വത്തേയും അതിന്റെ മഹത്വത്തേയും ആഴത്തില്‍ മനസ്സിലാക്കാന്‍ അവസരം നല്‍കുന്ന ചിത്രമാണ് കളിമണ്ണ്. വിവാദമുണ്ടാക്കുന്നവര്‍ ചിത്രം കാണുന്നതോടെ എല്ലാം മാറ്റിപറയുമെന്നും ഭാഗ്യലക്ഷ്മി പറഞ്ഞു.

സ്ത്രീയെ കേവലം സെക്‌സ് ഉപകരണമാക്കി ഇവിടെ പല ചിത്രങ്ങളും പുറത്തിറങ്ങുന്നുണ്ട്. എന്നാല്‍ ഇത്തരം ചിത്രങ്ങള്‍ക്കെതിരെ ആരും പ്രതികരിക്കാറില്ല. അത്തരം ചിത്രങ്ങള്‍ സ്വീകരിക്കുന്ന പ്രേക്ഷകന് എന്തുകൊണ്ട് ഈ ചിത്രവും സ്വീകരിച്ചുകൂടാ? ഭാഗ്യലക്ഷ്മി ചോദിച്ചു.

പ്രസവം കാണാന്‍ ആഗ്രഹിക്കുന്നവര്‍ക്ക് നെറ്റില്‍ നിരവധി വീഡിയോകള്‍ ലഭ്യമാണ്. എന്നാല്‍ കളിമണ്ണ് പ്രസവം കാണിക്കാനുള്ള ചിത്രമല്ലെന്നും അവര്‍ വ്യക്തമാക്കി. ചിത്രീകരണ സമയത്തുതന്നെ ഏറേ വിവാദമായ ചിത്രമാണ് കളിമണ്ണ്. സെക്‌സ് ചിത്രങ്ങള്‍ യാതൊരു വിമര്‍ശനം കൂടാതെ സ്വീകരിക്കുന്ന മലയാളികള്‍ ചിത്രത്തിനെതിരെ രംഗത്തെത്തിയത് ചര്‍ച്ചാവിഷയമായിരുന്നു. റംസാനില്‍ ചിത്രം തീയേറ്ററുകളിലെത്തുമെന്നാണ് പ്രതീക്ഷ.

Keywords: Entertainment news, Bhagya Lakshmi, Kalimannu, Blessi, Swetha Menon,