തിരുവനന്തപുരം: കേരളം കടുത്ത വരള്ച്ചാഭീഷണി നേരിടുകയാണെന്ന് മുഖ്യമന്ത്രി. ഇപ്പോള് തിരുവനന്തപുരം, കൊല്ലം, വയനാട്, ഇടുക്കി എന്നീ നാല് ജില്ലകളെയാണ് വരള്ച്ചാബാധിത ജില്ലകളായി പ്രഖ്യാപിച്ചിട്ടുള്ളത്. വരും ദിനങ്ങളില് കൂടുതല് ജില്ലകളെ വരള്ച്ചാബാധിത ജില്ലകളായി പ്രഖ്യാപിക്കേണ്ട അവസ്ഥയിലേക്കാണ് കാര്യങ്ങളുടെ പോക്കെന്നും മുഖ്യമന്ത്രി കൂട്ടിച്ചേര്ത്തു.
ബുധനാഴ്ച ചേരുന്ന ദുരന്തനിവാരണ അതോറിറ്റിയുടെ യോഗത്തില് വരള്ച്ചാ പ്രശ്നത്തിന് തീരുമാനം കൈക്കൊള്ളുമെന്നും മുഖ്യമന്ത്രി പറഞ്ഞു. നിയമസഭയില് അടിയന്തര പ്രമേയ നോട്ടീസിന് മറുപടി പറയുകയായിരുന്നു മുഖ്യമന്ത്രി. പറമ്പിക്കുളം ആളിയാര് കരാര് അനുസരിച്ച് ജലം വിട്ടുതരാന് തമിഴ്നാടിനോട് ആവശ്യപ്പെട്ടിട്ടുണ്ടെങ്കിലും ഇതുവരെ മറുപടി ലഭിച്ചിട്ടില്ല.
ഇക്കാര്യത്തില് ആവശ്യമെങ്കില് തമിഴ്നാട് ഗവ.നെതിരെ നിയമനടപടി സ്വീകരിക്കുമെന്നും അദ്ദേഹം വ്യക്തമാക്കി. വരള്ച്ചാബാധിത ജില്ലകള്ക്ക് കൂടുതല് ഫണ്ട് നല്കുന്ന കാര്യം പരിഗണനയിലാണെന്നും, നെല് കര്ഷകര്ക്ക് ഇന്ഷുറന്സ് പദ്ധതി ഏര്പ്പെടുത്തുമെന്നും മുഖ്യമന്ത്രി സഭയെ അറിയിച്ചു.
മുഖ്യമന്ത്രിയുടെ മറുപടിയെ തുടര്ന്ന് അടിയന്തരപ്രമേയത്തിനുളള അനുമതി സഭയില് നിഷേധിച്ചു.
വരള്ച്ചാബാധിതരെ സഹായിക്കുന്നതില് സര്ക്കാര് പരാജയപ്പെട്ടുവെന്ന് ആരോപിച്ച പ്രതിപക്ഷം സഭയില് നിന്ന് ഇറങ്ങിപ്പോയി.വരള്ച്ചാ പ്രശ്നം ഉന്നയിച്ച് മുല്ലക്കര രത്നാകരനാണ് അടിയന്തര പ്രമേയത്തിന് നോട്ടീസ് നല്കിയത്. പറമ്പിക്കുളം ആളിയാര് പദ്ധതിയില് നിന്ന് കരാര് പ്രകാരമുളള ജലം ലഭിക്കാത്തതുമൂലം പാലക്കാട്ട് ചിറ്റൂരിലെ കര്ഷകര് പ്രതിസന്ധിയിലാണെന്നും കേന്ദ്ര സംഘത്തിന് വരള്ച്ചയുടെ യഥാര്ഥ ചിത്രം ഇതുവരെ ലഭിച്ചിട്ടില്ലെന്നും മുല്ലക്കര രത്നാകരന് പറഞ്ഞു. ഇക്കാര്യത്തില് സര്ക്കാര് കേന്ദ്ര സര്ക്കാരില് സമ്മര്ദം ചെലുത്തി പരിഹാരം കാണണമെന്നും അദ്ദേഹം ആവശ്യപ്പെട്ടു.
Keywords: Dryness,Threatening, Vayanadu,Thamil nadu,Chief Minister, Thiruvananthapuram, Kollam, Idukki, palakkad, Farmers, Kerala, Kerala in strong drought threat: Oomman Chandi